Türkiyədə lirənin dəyər itirməsindən sonra alış-veriş üçün Naxçıvandan bu ölkəyə gedənlərin sayı artıb. Bu axının qarşısını almaq üçün Sədərək Gömrük İdarəsi yeni məhdudiyyət tətbiq etməyə başlayıb. Bu haqda “Gündəlik Naxçıvan”a məlumat verən sakinlər bildirib ki, Türkiyəyə bir ay ərzində cəmi iki dəfə – 15 gündən bir gedə bilərlər. Yerli sakinlər sözlərinə görə, gətirilən mallara da məhdudiyyət tətbiq edilir.
Sədərək rayon sakini Bahadur Əliyev bildirib ki, ucuzluq olduğundan hər həftə İğdır şəhərindən gedib alış-veriş edib. Qadağa tətbiq olunandan sonra isə bu fürsət əlindən çıxıb:
Meyvə, tərəvəz, toyuq və.s Türkiyədə Naxçıvandan 4-5 dəfə ucuz qiymətədir. Özləri gətirib bazarda od qiymətinə sata bilərlər. Başqa heç kimin ixtiyarı yoxdur. Bizim kimi kasıblar üçün ümid yeri idi ki, həftədə bir dəfə gedib alıb gətirək, uşaqlarımız meyvə, ət üzü görsün. Onu da əlimizdən aldılar. Özləri üçün bu qadağa yoxdur. Tonlarla vurub gətirib, bazarda od qiymətinə satırlar. Məcbur edirlər ki, gedib onlardan alaq. Türkiyə tərəfi bizə heç bir qadağa tətbiq etməyib. İstəsən, hər gün iki dəfə gedib-gələ bilərsən. Bizimkilər qoymur.
Bahadur Əliyev
Lirə dəyər itirdikdən sonra Türkiyədə cehizlik malların da qiyməti manata nisbətdə xeyli aşağı düşüb. Lakin çəkiyə məhdudiyyət tətbiq olunmağa başlayıb. Şahbuz rayon sakini Qulu Babayevin sözlərinə görə, Türkiyədən alıb gətirdiyi malın yalnız 30 kilosunu gömrükdən keçirə bilib.
Lirə təzə düşəndə qonşum gedib qızı üçün cehizliyi Türkiyədən almışdı. Hesabladıq, Naxçıvanla müqayisədə 5-6 dəfə ucuz düşürdü. Gedib yataq dəstindən tutmuş, cehizlik üçün lazım olan bir çox şeylər aldıq. Qayıdanda Sədərək gömrüyündə dedilələr ki, dünəndən qayda dəyişib, ancaq 30 kilo buraxa bilərik. Mənim aldıqlarım isə bundan 3-4 dəfə çox idi. 30 kilodan yuxarıya elə bir rüsum dedi ki, aldıqlarım Naxçıvandakından da baha düşdü. Məcbur qalıb o pulu ödədim. Çünki Türkiyəyə qaytarmaq imkanım da yox idi.
Qulu Babayev
Məsələni aydınlaşdırmaq üçün Sədərək Gömrük İdarəsi ilə əlaqə saxlanılıb. İdarənin baş inspektoru Ramazan Ağayev sakinlərin şikayətlərindən xəbərsiz olduqlarını bildirdi. O, “Gündəlik Naxçıvanın” sorğusunu Naxçıvan Gömrük İdarəsinə yönləndirib. Naxçıvan Şəhər Gömrük İdarəsindən isə bildirilib ki, sərnişinlərin gediş-gəlişinə sərhədd xidməti nəzarət edir. Yuxarı rüsum tətbiq olunmasına gəldikdə, qurum rəsmisi bu iddianı təkzib edib.
