ABŞ 2022-ci ildə əlavə 300 milyon dollarla Ukraynaya dəstəyini davam etdirəcək. Bunu ABŞ dövlət katibi Entoni Blinken Kiyevdə Ukraynanın xarici işlər naziri Dmitri Kuleba ilə görüşdən sonra deyib:
Rusiya Kiyevə qarşı aqressiv hərəkətləri davam etdirib hərbi müdaxiləyə cəhd etsə, ABŞ Ukraynanı əlavə müdafiə vasitələri ilə təmin edəcək. Keçən il Ukraynaya 2014-cü ildən bəri olduğundan daha çox müdafiə yardımı vermişik. Biz bunu davamlı olaraq edirik.
Entoni Blinken
Blinken bildirib ki, Birləşmiş Ştatlar Ukrayna ətrafındakı vəziyyətin nizamlanması üçün diplomatik səylərini davam etdirəcək, eyni zamanda Kiyevə hərbi yardımı artıracaq:
Biz Rusiyanın təcavüzünün qarşısını almaq, dialoq və sülhü təşviq etmək üçün yorulmaz diplomatik səylərimizi davam etdirəcəyik. Eyni zamanda, Ukraynanın müdafiə qabiliyyətini gücləndirməyə davam edəcəyik.
Entoni Blinken
Qeyd: Daha əvvəl ABŞ 2022-ci il büdcə layihəsində Ukraynaya ümumi məbləği 756 milyon dollar, o cümlədən təhlükəsizliyin möhkəmləndirilməsi üçün 400 milyon dollar məbləğində yardım nəzərdə tutulduğunu açıqlayıb.
