Azərbaycanın Serbiya, Monteneqro, Bosniya və Herseqovinada səfiri olmuş Eldar Həsənova hökm oxunub. O, 10 il müddətinə azadlıqdan məhrum edilib.
Məlumata görə, hökm Bakı Ağır Cinayətlər Məhkəməsinin hakimi Əfqan Hacıyevin sədrliyi ilə keçirilən prosesdə elan olunub. Hökmə əsasən, onun üzərinə həbs qoyulmuş bir neçə əmlakı müsadirə edilib.
Müsadirə edilən əmlaklar:
- Sabunçu rayonu, Nardaran qəsəbəsində bağ evi və torpaq sahəsi;
- Nəsimi rayonunda yerləşən mənzil;
- Nərimanov rayonunda yerləşən mağaza;
- Abşeron rayonu Novxanı qəsəbəsində yerləşən torpaq sahəsi;
- Xətai rayonunda yerləşən fərdi yaşayış evi;
- Monteneqroda yerləşən mənzil.
Qeyd: Eldar Həsənov Cinayət Məcəlləsinin 179.3.2 (mənimsəmə və ya israfetmə, külli miqdarda törədildikdə), 193-1.3.2 (cinayət yolu ilə əldə edilmiş pul vəsaitlərini və ya digər əmlakı leqallaşdırma, külli miqdarda törədildikdə) 308.2 (vəzifə səlahiyyətlərindən sui-istifadə etmə, ağır nəticələrə səbəb olduqda) 308-1.1 (Dövlət büdcəsinin vəsaitindən təyinatı üzrə istifadə etməmə) və 313-cü (vəzifə saxtakarlığı) maddələri ilə ittiham olunub.
