“Taliban” Əfqanıstanda hakimiyyəti ələ keçirdikdən sonra ilk dəfə olaraq Avropada Qərb rəsmiləri ilə rəsmi danışıqlar aparacaq. Norveç Xarici İşlər Nazirliyi bildirib ki, “Taliban” nümayəndələrini yanvarın 23-dən 25-dək Osloya dəvət edib.
Norveçin xarici işlər naziri Anniken Hyuitfeldt vurğulayıb ki, səfər “Taliban”ın legitimliyi və ya tanınması ilə bağlı deyil:
Bu gün ölkəni faktiki olaraq idarə edənlərlə danışılmalıdır. Siyasi vəziyyətin daha böyük humanitar fəlakətə səbəb olmasına imkan verə bilmərik.
Anniken Hyuitfeldt
Görüşlər Oslodakı oteldə bağlı qapılar arxasında aparılacaq. Danışıqlar üç gün davam edəcək.
Görüşün detalları:
- Heyət 15 nəfərdən ibarətdir. Qrupa “Taliban” hökumətinin xarici işlər naziri vəzifəsini icra edən Əmir Xan Müttəki rəhbərlik edir;
- Norveç, Böyük Britaniya, Fransa, Almaniya, İtaliya, Avropa İttifaqı və ABŞ nümayəndələri ilə görüş gözlənilir.
Görüşdə müzakirə ediləcək məsələlər:
- nümayəndəli siyasi sistemin qurulması;
- təxirəsalınmaz humanitar və iqtisadi böhranlara cavab verilməsi;
- təhlükəsizlik və terrorla mübarizə məsələləri;
- insan haqları, xüsusilə qızlar və qadınlar üçün təhsil.
Öz növbəsində “Taliban” iddia edir ki, Əfqanıstanın yeni hakimiyyət orqanları “Qərb dünyasının tələblərini yerinə yetirmək üçün” tədbirlər görüb və Avropa ölkələri ilə münasibətləri “diplomatiya yolu ilə” gücləndirməyə ümid edirlər.
Qeyd: “Taliban” nümayəndələri daha əvvəl Qətər, İran, Pakistan, Çin, Rusiya və Türkmənistanda danışıqlarda iştirak ediblər.
