Ötən il dekabrın 3-də Azərbaycanda digərlərindən fərqlənən, “Kekalove Adaptive” brendinin moda şousu baş tutub. Beynəlxalq Əlillər Günündə Bakıda keçirilən şounun unikallığı modellərin hamısının əlillərdən ibarət olması idi. “Kekalove Adaptive” 2019-cu ildə əlillərin ehtiyaclarına uyğun geyimlər hazırlayan, əlçatan moda brendi yaratmaq qərarı verən Məhəmməd Kekalovun məhsuludur.
Əlavə olaraq qeyd edək ki, “Adaptive Fashion” brendi 1980-ci illərin əvvəllərində, dizaynerlərin əlilliyi olan insanların ehtiyaclarını qarşılamaq üçün xüsusi olaraq hazırladıqları məhsulları bazara çıxardıqdan sonra populyarlaşmağa başlayıb. Modellərə arxası açıq üst geyimləri və paltarlar, yanları açıq olan şalvarlar daxildir. Lakin, Azərbaycanda ilk dəfə Kekalov bu cür paltarlar hazırlamağa təşəbbüs göstərib.
20 yaşlı Məhəmməd Kekalovun sözlərinə görə, onun ilham mənbəyi görmə qabiliyyətini itirmiş nənəsi olub və nənəsi tək başına geyinə bilmədiyi üçün travma yaşayıb. Nənəsinin başqalarından kömək istərkən stres yaşadığını müşahidə edən Kekalov belə qənaətə gəlib ki, əlillərin asanlıqla geyinə biləcəkləri paltarlar əlçatan olmalıdır.
Dizayner əlilliyi olan şəxslərin gündəlik üzləşdikləri çətinlikləri gördükdən sonra dərk edib ki, digər insanlar əlillərin problemlərindən, hətta şalvar geyinmək kimi gündəlik məşğuliyyətlərdə belə çətinlik çəkdiklərindən xəbərdar deyillər:
Əlilliyi olmayanlar üçün bu proseslər asan gəlir və onlar buna alışdıqca, hətta bəzən nə qədər tez-tez etdiklərini anlaya bilmirlər. Ancaq əlil arabasından istifadə edən şəxslər üçün bu böyük problemdir. Çünki bir çox əlil ayağa dura və ya ayağını qaldırıb şalvarı geyinə, düymələyə bilmir. Təəssüf ki, brendlər, istehsalçılar, dizaynerlər və digər insanlar bu problemləri başa düşmürlər.
Məhəmməd Kekalov
Tikiş maşınından səhnəyə
Moda nümayişindən bir neçə həftə əvvələ qədər “Kekalove Adaptive” brendinin emalatxanasın tikiş maşınları dayanmadan işləyib, Kekalovun əlillərdən aldığı rəylər və şərhlər əsasında yeni dizaynlar hazırlayıblar.
Adaptiv dəb dizayn etmək çətindir. Çünki atelyedəki iki dərzi təkcə moda sənayesinin gözləntilərinə cavab verən, hər bir modelə uyğun olan geyimlər deyil, müxtəlif növ əlilliyi olan insanlar üçün əlçatan modellər yaradır.
“Kekalove Adaptive” brendinin moda şousunda iştirak etmək bir neçə modelin debütü olub. Onların bir çoxu əlilliyi olan insanların regiondakı moda dünyasına daxil edilməsinin normal qəbul olunması üçün göstərilən səylərin bir parçası olmaqdan xoşbəxt olublar.
37 yaşlı paralimpiyaçı, hazırda tələbə olan Fatimə Əkbərli “Kekalove Adaptive” şousunda seçilən modellərdən biri olub. O, qılıncoynatma, paraşütlə tullanma və üzgüçülüklə məşhurlaşıb. O, hətta iki yarışda birinci yeri tutub. Fatimə əvvəllər də Məhəmməd Kekalov üçün modellik edib və tez-tez ona brendini tanıtmaqda köməklik edib:
Əlilliklər fərqli olur. Bəzi insanların qolları sağlamdır və geyimlərini geyinə bilir, bəzilərinin isə ayaqları və qolları zəif olur. Burada hər kəs öz paltarını hazırlayır.
Fatimə Əkbərli
Paralimpiyaçı moda sənayesinin ənənəvi olaraq üstünlük verdiyi gözəllik standartlarına az diqqət yetirdiyi üçün “Kekalove Adaptive” brendinin bu addımını alqışlayıb.
Mən başqa ölkələrdə əlilliyi olan modellər görmüşəm, ancaq belə bir layihənin Azərbaycanda keçirilə biləcəyi ağlıma gəlməzdi. Ölkəmdə baş tutan bir ilkə qatıldım. Bu, çox çətin olmadı. Nümayiş ideal çəki və ya boy tələb etmirdi. Ona görə də hər şey çox rahatdır.
Fatimə Əkbərli
18 yaşından bəri əlil arabası istifadə edən 43 yaşlı model Aynurə Cəfərova üçün şouya qatılmaq fürsəti həm böyük zövq, həm də qürur mənbəyi olub:
Mən dərhal qəbul etdim. Mənə nümayişdə iştirak etmək təklif edildi. Bu sevinc, həyəcan və qorxu ilə dolu qeyri-adi bir hissdir. Belə nümayişləri sevirəm, çünki əlil olmağıma baxmayaraq mən modeləm. Bu mənim ikinci modellik təcrübəmdir. 2019-cu ildə ilk dəfə model kimi çıxış edəndə valideynlərimə demədim. İstəmədim ki, onlar məni səhnədə görsün. Bu dəfə evə gələndə sevindilər. Ailəm mənimlə qürur duyur.
Aynurə Cəfərova
