“Transparency International” təşkilatı illik Korrupsiyanı Qavrama İndeksininin 2021-ci il üzrə hesabatını yayımlayıb. Hesabat Dünya Bankı, Dünya İqtisadi Forumu və təhlil mərkəzləri kimi 13 xarici mənbənin datalarından toplanan məlumatlara əsasən hazırlanır.
Korrupsiyanı Qavrama İndeksində 180 ölkə dövlət sektorundakı korrupsiyaya əsasən sıralanır. 0-100 ballıq şkalaya görə, ən aşağı bal yığan ölkədə korrupsiya daha çoxdur. Dünya üzrə ortalama indeks artıq 10-cu ildir ki, 43 olaraq qalır, ölkələrin üçdə ikisinin balı 50-dən aşağıdır.
Korrupsiya və vətəndaş azadlığının pozulması ilə bağlı şkalada qonşu Gürcüstan 55, Ermənistan 49 balla Azərbaycandan irəlidədir. Qeyd edilir ki, Ermənistan son beş ildə öz KQİ balını əhəmiyyətli dərəcədə yaxşılaşdıra bilib və 2017-ci ildən bu yana 14 pillə artıb.
Qonşu ölkələrdən geriləyən Azərbaycanın Korrupsiyanı Qavrama İndeksi 30-dur. Bu isə aşağı göstərici hesab edilir.
Qurumun hazırladığı hesabatda vurğulanır ki, Azərbaycan 2012-ci ildən bəri 25-30 bal arası qiymətləndirilir və bununla da Korrupsiyanı Qavrama İndeksinin dibindəki üçüncü hissədə yer alır.
2017-ci ildə “Azərbaycanın pulyuyan maşını” adlı araşdırma hökumətin öz imicini yaxşılaşdırmaq üçün Danske Bank vasitəsilə Avropada siyasətçilərə ödənişlər etməsi faktlarını üzə çıxarıb. Bundan əlavə, ölkədə tanınmış müxalifətçilər və jurnalistlər həbs olunub.
İlk onluqda olan ölkələr:
Danimarka – 88 bal
Finlandiya – 88 bal
Yeni Zelandiya – 88 bal
Norveç – 85 bal
Sinqapur – 85 bal
İsveç – 85 bal
İsveçrə – 84 bal
Niderlan – 82 bal
Lüksemburq – 81 bal
Almaniya – 80 bal
Sıralamada digər pillələri Qərbi və Şimali Avropa ölkələri tutur.
Son pillədə olan ölkələr:
Liviya – 17 bal
Əfqanıstan – 16 bal
Şimali Koreya – 16 bal
Yəmən – 16 bal
Venesuela – 14 bal
Somali – 13 bal
Suriya – 13 bal
Cənubi Sudan – 11 bal
