Britaniyanın Milli Cinayət Agentliyinin (NCA) azərbaycanlı deputat Cavanşir Feyziyevə məxsus bank hesablarında saxlanılan 15 milyon funt-sterlinqlə bağlı araşdırmaları yekunlaşıb.
Deputatın həyat yoldaşı Pərvanə Feyziyeva, oğlu Orxan Cavanşir və qardaşı oğlu Elman Cavanşirin adına olan 6 hesabın dondurulması barədə qərar çıxarılıb. Böyük Britaniyanın bank hesablarında deputatın ailə üzvlərinə məxsus 15 milyon funt-sterlinqin 5,6 milyon-u müsadirə olunub.
Pullar ölkədən necə çıxarılıb: “Azərbaycan çamaşırxanası” vasitəsilə Estoniya və Latviyada bank hesabları idarə edən vasitəçi şirkətlərin köməyilə daşınıb. Bu, “dəstələmə” kimi tanınan prosesdir. Köçürmələrin bəziləri qanuni və əhəmiyyətli biznes əməliyyatlarını dəstəkləmək məqsədi daşıyan sənədlər, o cümlədən hesab-fakturalar və müqavilələrlə edilib.
Məhkəmə qərarı: “Westminster Magistrates” məhkəməsi 3 həftə davam edən mübahisəli məhkəmə prosesinin sonunda qərar verib ki, bu sənədlər tamamilə uydurmadır. Təqdim edilmiş sübutlar nəzərdən keçirilib və müəyyən zamanlarda Azərbaycan, Estoniya və Latviyada çirkli pulların yuyulması sxeminin mövcudluğu aydın olub.
Pərvanə Feyziyevanın müsadirə olunan əmanətlərinin “Hilux” və “Polux” şirkətlərindən alınan və cinayətkar fəaliyyət nəticəsində qazanılan pullardan əldə edildiyi bildirilir.
Kimdən nə qədər müsadirə olunub:
- Pərvanə Feyziyeva – 4,4 milyon;
- Orxan Cavanşir – 1 milyon;
- Elman Cavanşir – 240 min.
Ailənin iddiası: Ailə Regents Parkı yaxınlığında yerləşən “Cumberland Terrace”dakı milyonlarla funt dəyərində olan evin pulunu da bu sərvətlə ödədiyini iddia edir.
