Gürcüstan parlamentində Ukraynanı dəstəkləyən qətnamə qəbul edilib. OC Media yazır ki, qətnamədə Ukrayna böhranında Rusiyanın iştirakının qeyd olunmaması parlamentdə müzakirəyə səbəb olub.
Qətnamədə nə deyilir: NATO-ya üzvlük hər hansı bir dövlətin suveren hüququdur. Hərbi və ya siyasi vasitələrlə bu hüququn məhdudlaşdırılması cəhdi qəti şəkildə qəbuledilməzdir.
Gürcüstan parlamentinin millət vəkilləri hazırlanan qətnamə ilə bağlı razılığa gələ bilməyiblər. “Vahid Milli Hərəkat” partiyası da daxil olmaqla, bütün müxalifət partiyaları Rusiya faktorunun qətnaməyə daxil edilməməsinə etiraz edib. Onlar parlamentdən kənar bəyanat hazırlayaraq bunu internet vasitəsilə paylaşıb.
Müxalif partiyaların bəyanatında nələr qeyd edilib:
- Rusiyanın hərbi eskalasiyası ilə bağlı çox narahatıq
- Rusiyanın Ukraynanın ərazi bütövlüyünə qarşı zor tətbiq etmək hədələrini pisləyirik.
“Gürcü Arzusu”nun parlamentdəki lideri Mamuka Mdinaradze bəyannamənin dilini “populist və təxribatçı ritorikadan azad” adlandırıb.
Gürcüstan hökumətini tənqid edənlər isə vurğulayır ki, Ukrayna ilə bağlı bəyanatları daha çox Xarici İşlər Nazirliyi verir, amma hökumətin başçısı, baş nazir İrakli Qaribaşvili isə bu məsələdə susqunluq nümayiş etdirir.
Gürcüstan- Ukrayna münasibətləri: Gürcüstanın keçmiş prezidenti Mixeil Saakaşvili uzun müddət Ukraynada yaşadığı üçün son illərdə Ukrayna və Gürcüstan arasında münasibətlər gərginləşib. Bununla yanaşı Gürcüstan həmişə Ukraynanı strateji müttəfiq kimi qəbul edib.
Bundan əvvəl hansı qətnamə qəbul edilib: 2014-cü ilin mart-sentyabr aylarında Rusiyanın Krımı ilhaq etməsi və Donbassda müharibə başladıqdan sonra Gürcüstan Ukraynaya dəstək nümayiş etdirən iki qətnamə qəbul edib. Hər iki qətnamədə Rusiyanın məsələdəki mənfi rolu pislənib.
