Rusiya Monteneqronun Daxili İşlər Nazirliyinin dövlət katibi Zoran Milyaniçin ölkəyə girişinə qadağa qoyub. Bu haqda məlumatı Rusiya Xarici İşlər Nazirliyi yayıb:
Fevralın 2-də Rusiya XİN-i Monteneqronun Daxili İşlər Nazirliyinin dövlət katibi Zoran Milyaniçin Rusiya Federasiyasına girişinin qadağan edilməsi ilə bağlı Monteneqrodakı Rusiya səfirliyinə nota göndərib.
Rusiya Xarici İşlər Nazirliyi
Nazirlik qeyd edib ki, bu tədbir Rusiyada “Çerkizovski” bazarının keçmiş sahibi, azərbaycanlı biznesmen Telman İsmayılova 2021-ci ilin oktyabrında siyasi sığınacaq verilməsinə cavabdır.
Telman İsmayılovun Rusiyadan qaçma səbəbi: İş adamı “Stroy Market” ticarət mərkəzlərinin sahibi Vladimir Savkin və “Lyublino-Motors” şirkətinin təsisçisi Yuri Brılevin qətli ilə bağlı 2017-ci ildə qiyabi həbs edilib. Beynəlxalq axtarışa verilən Telman İsmayılov eyni zamanda, silah alverində və müğənni Avraam Russonun oğurlanmasını təşkil etməkdə ittiham olunur.
