Rusiya Almaniyanın “Deutsche Welle” media şirkətinin ölkədə yayımını qadağan edib. Şirkətin yaydığı məlumatda qeyd edilib ki, Rusiyanın bu qərarından sonra nəşrin Moskvadakı bürosu bağlanıb.
Nəşrin əməkdaşı İrina Filatovanın sözlərinə görə, xəbəri yerli vaxtla səhər saat 09:00-da alıblar:
“RT DE”nin yayımı Almaniyada qadağan edildikdən sonra açıq şəkildə bəzi tədbirlər gözləyirdik. Lakin Rusiya hakimiyyətinin bu qədər sərt cavab verəcəyinə inanmırdıq. Bütün əməkdaşlarımızın akkreditasiyası ləğv edilib.
İrina Filatova
“Deutsche Welle”nin direktoru Peter Limburq bildirib ki, şirkət Rusiya hakimiyyətinin qərarına etiraz etmək üçün hüquqi addımlar atacaq.
Rusiya niyə belə qərar verib: Fevralın əvvəlində Almaniyanın Media Lisenziyalaşdırma və Nəzarət Komissiyası Rusiyanın “RT DE” telekanalının lisenziyası olmadığı üçün alman dilində yayımını dayandırıb. Bundan sonra Rusiya Xarici İşlər Nazirliyi qeyd edib ki, Almaniya hakimiyyətinin qərarı Moskvanı Rusiyada akkreditə olunmuş alman KİV-lərinə qarşı cavab tədbirləri görməyə məcbur edir.
