Kanadanın paytaxtı Ottavada yük maşınlarının sürücülərinin etirazları ilə əlaqədar şəhərdə fövqəladə vəziyyət elan edilib. Yerli CP24 telekanalının məlumatına görə, qərarı şəhərin meri Cim Uotson verib:
Ottavada etirazlarla bağlı vəziyyət nəzarətdən çıxıb. Fövqəladə vəziyyətin elanı şəhər sakinlərinin təhlükəsizliyini təmin etməklə əlaqəlidir.
Cim Uotson
Mer onu da qeyd edib ki, yük maşını sürücülərinin etirazlarına artıq şəhər polisi nəzarət etmir, aksiyanı dayandırmaq üçün polis əməkdaşları çatışmır.
Sürücülərin etiraz səbəbi: Yük maşını sürücüləri ABŞ sərhədini keçmək üçün COVID testi verməli, ya 2 həftə özünü təcrid etmə, ya da koronavirusa qarşı peyvənd olunmalıdır. Etiraz bununla bağlı başlasa da, artıq Kanadada bütün anti-COVID tədbirlərinin ləğvi tələb olunur.
Etirazlar nə vaxtdan başlayıb: Yanvarın 29-dan başlayan etiraz aksiyasına fevralın 5-dən Ottava sakinləri və digər şəhərlərdən gələn vətəndaşlar da qoşulub. Aksiyaya qatılanların sayı 5 mini ötüb.
