Avstriya hökuməti Ukraynaya dəstək verməyə və Rusiyaya qarşı sanksiyalar tətbiq etməyə hazır olduğunu bəyan edib. Bu barədə Avstriyanın xarici işlər naziri Aleksandr Şallenberq Kiyevdə Ukrayna, Çexiya və Slovakiyanın xarici işlər nazirləri ilə birgə mətbuat konfransında bildirib:
Rusiya Ukraynaya hücum edərsə, Avstriya rəsmi Kiyevə dəstək göstərməyə və sanksiyalar paketini dəstəkləməyə hazırdır. Bu, hər kəs üçün ağrılı olacaq. Biz bu yolla getmək istəyirik? Yox. Amma biz belə çəkindirici vasitələrdən istifadə etməli olacağıq.
Aleksandr Şallenberq
Eyni zamanda Şallenberq hesab edir ki, Rusiyaya qarşı gələcək sanksiyaların təməli “Şimal axını 2” qaz kəməri olmamalıdır.
Rusiya iddialara nə cavab verir: Ukrayna ətrafında vəziyyəti gərginləşdirmək planlarını qəti şəkildə rədd edir və daim bəyan edir ki, heç kimi təhdid etmirlər.
Hansı ölkələr sanksiyalar hazırlayıb: Avropa İttifaqı Rusiyaya qarşı sanksiyalar paketi hazırlayıb və bəyan edib ki, Ukraynaya hücum olunarsa, sanksiyalar dərhal tətbiq olunacaq.
Britaniya hökuməti də Rusiyaya sanksiyaların tətbiqini nəzərdə tutan qanun layihəsini parlamentə təqdim etməyi planlaşdırır. Bu sanksiyalar Rusiya bankları, enerji şirkətləri və Kremlə yaxın oliqarxları əhatə edəcək.
