Ukraynanın xarici işlər naziri Dmitri Kuleba beynəlxalq tərəfdaşların Ukraynaya min tondan çox müdafiə silahı və hərbi texnika verdiyini açıqlayıb. “UNIAN” yazır ki, onlayn brifinqdə Kuleba ölkə diplomatiyasının 3 aydır ki, gücləndirilmiş antiböhran rejimində işlədiyini bildirib:
Biz tərəfdaşlarla daim təmasdayıq və Ukraynaya dəstək üçün beynəlxalq koalisiyanı birləşdirməyə davam edirik. Bu iş sayəsində bu gün Ukrayna gücləndirilmiş siyasi, iqtisadi və təhlükəsizlik dəstəyi alır. Bu həftələr və aylar ərzində edilən yardımların ümumi həcmi 1,5 milyard dolları keçib. Ukraynaya çatdırılan müdafiə silahları və hərbi texnikanın ümumi çəkisi 1000 tondan çoxdur.
Dmitri Kuleba
XİN rəhbəri vurğulayıb ki, rekord həcmdə dəstək Ukraynanın danışıqlar masası arxasında mövqeyini möhkəmləndirdiyi üçün böyük siyasi əhəmiyyət kəsb edir.
Ukrayna ətrafında nə baş verib: Rusiya Ukrayna sərhədinə əlavə ordu yerləşdirərək hərbi təlimlərə başlayandan sonra müharibə ehtimalını nəzərə alan Qərb ölkələri Ukraynaya hərbi dəstək göstərmək qərarına gəliblər. Kiyevə ABŞ, Böyük Britaniya, Kanada, Fransa, Polşa, Litva, Estoniya, Çexiya, Bolqarıstan və Rumıniya silah verib.
