Baş Prokurorluq “Tərtər işi” ilə bağlı hərbi qulluqçulara işgəncə verməkdə ittiham olunan şəxslərin həbs edildiyi haqda məlumat yayıb. Bildirilir ki, cinayət işinin istintaqı zamanı ayrı-ayrı hərbi qulluqçulara işgəncə verən, onları qanunsuz azadlıqdan məhrum edərək vəzifə səlahiyyətlərini aşan şəxslər Cinayət Məcəlləsinin müvafiq maddələri ilə ittiham ediliblər. Həmin şəxslər barəsində məhkəmənin qərarları ilə həbs qətimkan tədbiri seçilib.
Həbs edilənlər, ittiham edildikləri maddələr:
Vüsal Əziz oğlu Ələsgərov;
Rüstəm Çərkəz oğlu Ələsgərov;
Ramil Fariz oğlu Qarayev.
Hər üç şəxs Cinayət Məcəlləsinin 145.3 (qanunsuz azadlıqdan məhrum etmə), 293.2 (işgəncə, işgəncə hesab olunmayan qəddar, qeyri-insani, yaxud ləyaqəti alçaldan rəftar və ya cəza), 341.2.2 (vəzifə səlahiyyətlərini aşma) və 341.2.3-cü maddələri ilə ittiham edilir.
Fuad Arazi oğlu Axundov CM-nin 127.2.2 (qəsdən sağlamlığa az ağır zərər vurma), 145.3, 293.3, 341.2.2 və 341.2.3 maddələri ilə təqsirləndirilir.
“Tərtər işi” haqda nələr məlumdur:
- 2017-ci ilin mayında Baş Prokurorluq, Müdafiə Nazirliyi, Daxili İşlər Nazirliyi və Dövlət Təhlükəsizliyi Xidməti bir qrup hərbi qulluqçu və mülki şəxslərin ölkəyə xəyanət etdikləri və Ermənistana məlumat ötürdükləri haqda bəyanat yayıb;
- İstintaq prosesi qeyri-rəsmi olaraq “Tərtər işi” adlandırılır. Səbəb kütləvi işgəncələrin Tərtər rayonunun Şıxarx qəsəbəsində yerləşən istismara yararsız və istifadə edilməyən 1-ci Ordu Korpusunun tabeliyində olan hərbi hissənin keçmiş Qərargahında baş verməsidir;
- Qeyri-rəsmi məlumatlara görə, “Tərtər işi”ndə 25 nəfər vətənə xəyanətdə təqsirləndirilib, 9 nəfər isə işgəncələr nəticəsində ölüb.
- Hadisə haqda ilk rəsmi məlumatı 2021-ci ilin oktyabrında Hərbi prokuror Xanlar Vəliyev verib. O, yalnız işgəncə verilən hərbçilərin sayını açıqlayaraq 102-103 nəfərə müxtəlif formada işgəncələr verildiyini, cinayət işi başlayanadək yalnız bir nəfərin öldüyünü deyib.
