Ağ Ev Rusiyanın Ukraynaya müdaxiləsi olduğu halda amerikalıları təxliyə etmək üçün ABŞ qoşunlarını Polşada yerləşdirmək planını təsdiqləyib. “The Wall Street Journal”ın yazdığına görə, ABŞ-ın 82-ci Hava Desant Diviziyasının hərbçiləri yaxın günlərdə Polşanın Ukrayna ilə sərhədində nəzarət-buraxılış məntəqələri, çadır düşərgələri və digər müvəqqəti obyektlər qurmağa başlayacaqlar.
ABŞ rəsmiləri bildiriblər ki, qoşunların Ukraynaya daxil olmasına icazə verilmir və amerikalıları Ukraynadan çıxarmayacaqlar. Əvəzində Ukraynadan Polşaya evakuasiya olunanların Amerikaya getməsi üçün maddi-texniki dəstək və yardım göstərəcəklər.
ABŞ hansı addımları atıb: Yanvarın 24-də ABŞ Dövlət Departamenti öz əməkdaşlarının və onların ailə üzvlərinin Kiyevdəki səfirlikdən könüllü təxliyəsinə icazə verib. Bundan əlavə, ABŞ öz vətəndaşlarına Belarusa səfər etməməyi tövsiyə edib və Rusiyanın Ukraynaya mümkün müdaxiləsi ilə bağlı amerikalı diplomatların ailələrinə ölkəni tərk etməyi əmr edib.
