Avropa İnsan Haqları Məhkəməsi Azərbaycandan göndərilən 6 şikayət ərizəsini yoxlayaraq 4 yekun qərarı elan edib. Məlumata görə, 2 işdə tərəflər dostca anlaşıblar, 1 qərar hökumətin birtərəfli bəyannaməsi nəzərə alınaraq qəbul edilib. Şikayəti təmin edilənlərdən biri “Azərbaycan Beynəlxalq Bankı” ASC-nin İdarə Heyətinin keçmiş sədri, hazırda həbsdə olan Cahangir Hacıyevdir.
Şikayətlərin motivi və ödəniləcək məbləğlər:
1. Cahangir Hacıyev azadlıq və toxunulmazlıq hüququna müdaxilənin baş verdiyini iddia edib. Qərara əsasən, Azərbaycan hökuməti ona 3500 avro təzminat ödəməlidir.
2. Yetkinlik yaşına çatmayan Əmrah Salmanovun şikayəti oğurluqda iştirakda şübhəli bilinərək həbs edilməsi, barəsində həbs-qətimkan tədbiri seçilməsilə bağlı olub. Hökumət ərizəçiyə 12 000 avro mənəvi zərər təzminatı və 1000 avro hüquqi məsrəf əvəzi ödəyəcək.
3. Ülvi Nuriyev və Coşqun Salahovun şikayəti 2013-cü ildə müxalif qüvvələrin icazəli dinc aksiyasında saxlanılması, inzibati qaydada həbs edilmələri ilə bağlı olub. Azərbaycan tərəfi hər 2 şəxsə ümumilikdə 16 000 avro təzminat verməlidir.
4. Məhəmməd Mustafayevlə Ceyhun Süleymanov qanunsuz azadlqıdan məhrum etməyə görə təyin olunan təzminatın məbləğinin azlığından şikayət etmişdi. Məhkəmənin qərarına əsasən, hökumət ərizəçilərin hər birinə 7500 avro təzminat ödəyəcək.
Şikayətçilərə ödəniləcək məbləğ ümumilikdə 47 500 avro təşkil edir.
