Azərbaycan Milli Elmlər Akademiyasının (AMEA) prezidenti Ramiz Mehdiyev AMEA Rəyasət Heyətinin iclasından istefa verib. Bu haqda məlumatı Elmlər Akademiyasının mətbuat xidməti yayıb.
Akademik Ramiz Mehdiyev bildirib ki, istefasının son günlər onun haqqında yayılan məlumatlarla əlaqəsi yoxdur, yaşı ilə əlaqədar AMEA-dakı postunu tərk etməyə qərar verib. Ramiz Mehdiyev onu da əlavə edib ki, istefa ərizəsi ilə prezidentə müraciət edəcək.
Ramiz Mehdiyev kimdir: 83 yaşlı akademik 1994-cü ildən 1995-ci ilədək Azərbaycan Respublikası Prezidentinin İcra Aparatının ümumi şöbəsinin müdiri olub.1995-2019-cu illər ərzində Prezident Administrasiyasının rəhbəri kimi çalışıb. Prezidentinin Administrasiyasının rəhbəri vəzifəsindən sonra Azərbaycan Prezidenti yanında Təhlükəsizlik Şurasının üzvü təyin edilib. 2019-cu ildən 2022-ci ilin 14 fevralına qədər Azərbaycan Milli Elmlər Akademiyasının prezidenti olub.
Təltif və mükafatları:
- “İstiqlal” ordeni (2008);
- “Şərəf” ordeni (2013);
- “Şöhrət” ordeni (2018);
- “Heydər Əliyev” ordeni (2019);
- “Azərbaycan Respublikasının Nizami Gəncəvi adına Qızıl medalı” (2021);
- AMEA-nın Fəxri fərmanı (2021).
