Avropa Parlamenti Avropa Komissiyasının təklifi əsasında Ukraynaya 1,2 milyard avro məbləğində fövqəladə makromaliyyə yardımı paketi verməyə razılaşıb. Bu haqda məlumatı Avropa Parlamentinin rəsmi saytı yayıb.
Vəsaitin Ukraynaya ayrılması ilə bağlı 694 deputatdan 598-i lehinə, 55- əleyhinə səs verib, 41 deputat isə bitərəf qalıb. Yardım proqramı Aİ Şurası tərəfindən təsdiqləndikdən sonra qüvvəyə minəcək.
Kredit hansı formada veriləcək:
- Makromaliyyə yardımı 12 ay müddətinə nəzərdə tutulub və hər biri 600 milyon avro olan iki tranşdan ibarət olacaq;
- Birinci tranşın dərhal ayrılması planlaşdırılır, ikinci tranşın verilməsi Ukraynanın Aİ ilə Anlaşma Memorandumunun şərtlərini yerinə yetirməsindən asılı olacaq.
Qeyd edilib ki, sözügedən yardım Rusiya-Ukrayna münaqişəsinin gərginləşməsi fonunda Ukraynanın iqtisadi və maliyyə sabitliyini qorumaq üçün nəzərdə tutulub.
