Böyük Britaniya “çirkli pul” axınının qarşısını almaq məqsədilə bir neçə həftə ərzində “Tier 1” investor vizası (qızıl viza) rejimini dayandırmağa hazırlaşır. “Financial Times” yazır ki, viza sxemi Ukrayna ətrafında böhran fonunda Rusiyanın “çirkli pulları”nın Britaniyaya axınını dayandırmaq məqsədilə ləğv ediləcək.
2020-ci ildə parlamentin kəşfiyyat və təhlükəsizlik komitəsi bildirib ki, Britaniyanın investor viza sxemi bir çox rusiyalının diqqətini çəkib və krallıq offşor sərvətlər üçün “camaşırxana”ya çevrilib. Qeyd olunub ki, 2020-ci ilin sentyabrından 2021-ci ilin sentyabrına qədər Böyük Britaniya hökuməti 798 “qızıl viza” verib, onlardan 82-si ruslar, 210-u isə Çin vətəndaşları tərəfindən alınıb.
“Tier 1” investor vizası nədir: Bu viza Böyük Britaniyada ən azı 2 milyon funt-sterlinq investisiya qoymaq istəyən xarici vətəndaşlara verilir. Eyni zamanda, “çirkli pullar”la mübarizə aparmaq üçün əcnəbilər hüquq-mühafizə orqanlarına kapitalın mənşəyini mütləq izah etməlidir.
Britaniya hazırda Rusiya faktoruna görə “qızıl viza” rejimini dayandırmağa çalışsa da, fərqli illərdə Azərbaycan vətəndaşlarının da Londondan “çirkli pulları yumaq” cəhdləri olub. Həmin şəxslər arasında prezident İlham Əliyevin ailə üzvləri, eyni zamanda məmurların da adı hallanıb. Müxtəlif vaxtlarda Korrupsiyaya və Mütəşəkkil Cinayətkarlığa qarşı Jurnalistika Layihəsi və başqa təşkilatlar araşdırmalar apararaq adları və detalları açıqlayıb.
İndiyədək kimlər haqda məlumatlar yayılıb:
- İlham Əliyevin qızları Leyla və Arzu Əliyevalar, onların dayısı oğlanları Mircəlal və Mircamal Paşayevlər Britaniyada milyonlarla dollarlıq mülklərin sahibidirlər.
- Leyla və Arzu Əliyevalar gizli ofşor şirkətlərindən istifadə etməklə Londonda 60 milyon funt dəyərində əmlak almaq istəyib.
- İlham Əliyev və ailə üzvləri ofşor şirkətlər vasitəsilə Böyük Britaniyada, Londonda təxminən 700 milyon dollarlıq əmlak əldə ediblər. Sənədlərə əsasən, ailə 17 mülkü nağd ödənişlə alıb.
- İlham Əliyevin əmisi qızı, 10 ildən çoxdur Londonda yaşayan İzzətxanım Cavadova və həyat yoldaşı Süleyman Cavadov Britaniyaya milyonlarla “çirkli pul” gətirməkdə ittiham olunublar.
- Eks-bankir, hazırda həbsdə olan Cahangir Hacıyevin həyat yoldaşı Zamirə Hacıyeva 10 il ərzində Londonun məhşur “Harrods” mağazasında 21 milyon dollar xərcləyib. Britaniya məhkəməsi Hacıyevadan bu qədər pulu haradan aldığını açıqlamasını tələb edib.
- Deputat Cavanşir Feyziyevin Britaniyadakı bank hesablarında saxlanılan 15 milyon funt-sterlinqlə bağlı araşdırma aparılıb. Deputatın həyat yoldaşı, oğlu və qardaşı oğlunun adına olan 6 hesabıdondurulub, mənşəyi şübhə doğuran 15 milyon funt-sterlinqin 5,6 milyon-u müsadirə olunub.
