Tanınmayan Donetsk Xalq Respublikasının (DXR) rəhbəri Denis Puşilin Donbassdakı təhlükəli vəziyyətlə əlaqədar əhalinin Rusiyaya evakuasiya edilməsi ilə bağlı hazırlıqlar görüldüyünü bəyan edib. Onun sözlərinə görə, fevralın 18-dən yerli sakinlərin təxliyəsi həyata keçiriləcək:
İlk növbədə qadınlar, uşaqlar və qocalar evakuasiya olunur. Rusiya rəhbərliyi ilə razılaşdırılaraq Rostov vilayətində vətəndaşlarımızın qəbulu və yerləşdirilməsi üçün yerlər hazırdır. Təxliyə edilənlər hər şeylə təmin olunacaqlar. Keçid məntəqələrində sürətli keçid üçün hər cür şərait yaradılıb. Dinləyib düzgün qərar verməyinizi xahiş edirik. Müvəqqəti köç sizin və yaxınlarınızın həyatını, sağlamlığını xilas edəcək.
Denis Puşilin
DXR rəhbəri bildirib ki, Ukrayna prezidenti Vladimir Zelenski tezliklə hərbçilərə Donbassda hücuma keçmək, DXR və Luqansk ərazisini işğal etmək əmri verəcək. Puşilinin sözlərinə görə, Ukrayna Silahlı Qüvvələri döyüş birləşmələrindədir və Donbası zorla ələ keçirməyə hazırdır.
DXR nədir: Kiyevdə 2013-cü ilin noyabrında başlamış kütləvi etiraz aksiyalarından sonra 2014-cü ilin aprelində Donetsk vilayətinin daxilində respublika elan edilib. BMT-nin məlumatına görə, 8 ildir davam edən münaqişədə 13 mindən çox insan həlak olub, 44 minə yaxın insan isə yaralanıb.
