Avropa İttifaqı ölkələri Ukraynaya Avropa Mülki Müdafiə Mexanizmi vasitəsilə təcili yardım yollayıb. Bu barədə Aİ Şurasının bəyanatında deyilir. Aİ-nin Böhran İdarəetmə Komissarı Yanez Lenarçiçin sözlərinə görə, yardım istəyən Ukraynaya kömək etmək üçün təşkilat gecə-gündüz işləyir:
Artıq Sloveniya, Rumıniya, Fransa, İrlandiya və Avstriya ilk təklifləri irəli sürüblər. Aİ-yə üzv olan digər dövlətlərdən yaxın günlərdə daha çox yardım gözləyirəm.
Yanez Lenarçiç
Bildirilir ki, yardıma çadırlar, yataq çantaları, maskalar, əlcəklər və dərmanlar daxildir.
Təklif olunan ilkin yardımlar:
- Sloveniya: 1 milyon maska, 125 min cüt lateks əlcək, 125 min cüt nitril əlcək, 200 cüt rezin çəkmə və 10 dizel elektrik generatoru (6 kVt);
- Rumıniya: 5 min paket ağrıkəsici, 5 min paket iltihab əleyhinə dərman, 5 min paket antibiotik və əl müalicəsi üçün 840 litr dezinfeksiyaedici;
- Fransa: 15 çadır, 300 ailə çadırı, 1500 torpaq plitələri, 2100 ədyal və 300 yataq çantası, 500 gigiyena dəsti, 25 hazır tualet, 3000 kimyəvi, bioloji, radioloji və nüvə əlcəklər, 10 min vinil əlcək, 50 min cərrahi maska, 5 min dərman qutuları və 500 yaralını müalicə edə bilən təkmil tibb məntəqəsi;
- İrlandiya: 10 min qoruyucu geyim, 50 min cərrahi maska, 2 min 583 litr əl təmizləyicisi;
- Avstriya: 50 min litr əl dezinfeksiyaedici, 9 min litr səthi dezinfeksiyaedici, 50 min qoruyucu eynək, 50 min üz maskası və 20 min steril olmayan əlcək.
Qeyd olunub ki, təcili mülki müdafiə yardımı artıq yoldadır.
