Böyük Britaniya Rusiya lideri Vladimir Putinə yaxın olan oliqarxlar və Rusiyanın Krımı işğalı zamanı maliyyə dəstəyi göstərən banklara qarşı sanksiyalar tətbiq edib. Bu haqda Britaniya hökuməti bəyanat yayıb. Məsələni şərh edən Xarici işlər naziri Liz Trass bildirib ki, bu sanksiyalar Rusiyaya ağır zərbə vuracaq:
Əgər Rusiya uçurumun kənarından geri çəkilməsə, biz daha da irəli getməyə hazırıq. Rusiya dövlətinin və Rusiya şirkətlərinin bazarlarımızda qazanc əldə etmək imkanlarını məhdudlaşdıracağıq. Bir sıra yüksək texnologiyanın ixracı qadağan edəcəyik.
Liz Trass
Nazir vurğulayıb ki, sanksiylar vasitəsilə Rusiya bankları qlobal iqtisadiyyatdan daha da təcrid olunacaq.
Hansı sanksiyalar olacaq:
- Rusiyanın 6-cı ən zəngin oliqarxı Gennadi Timçenko və iş adamlar Boris və İqor Rotenberqin Britaniyaya girişinə qadağa qoyulur;
- Gennadi Timçenko, Boris və İqor Rotenberqə məxsus bütün aktivlər dondurulur;
- “Bank Rossiya”, Qara Dəniz İnkişaf və Yenidənqurma Bankı, “İS Bank”, “Genbank” və Rusiyanın müdafiə sektorunun inkişafında əsas bank olan “Promsvyazbank”ın aktivləri dərhal dondurulur.
Qeyd olunub ki, Böyük Britaniya həmçinin, qondarma Donetsk və Luqansk Respublikalarının müstəqilliyinin tanınmasına səs verən Rusiya deputatlarına da sanksiya tətbiq edəcək.
