Tanınmış bloqer, LGBT fəalı, jurnalist kimi fəaliyyət göstərən Əvəz Şıxməmmədov (Hafizli) qətlə yetirilib. Baş Prokurorluğun yaydığı məlumata görə, hadisə Sabunçu rayonunun Balaxanı qəsəbəsində baş verib. Bildirilir ki, 24 yaşlı Əmrulla Güləliyev əmisi oğlu, həmyaşıdı Əvəz Şıxməmmədovu bıçaqla qətlə yetirib.
Prokurorluq və polis əməkdaşları tərəfindən məhkəmə-tibb ekspertin iştirakı ilə hadisə yerinə, meyitə baxış keçirilib, eyni zamanda şahidlər dindirilib. Qeyd edilir ki, Əmrulla Güləliyev cinayəti törədərkən sərxoş vəziyyətdə olub və ifadəsində cinayəti aralarında yaranmış şəxsi mübahisə zəminində törətdiyini etiraf edib.
Faktla bağlı Sabunçu Rayon Prokurorluğunda Cinayət Məcəlləsinin müvafiq maddələri ilə cinayət işi başlayıb. Ə.Güləliyev tutularaq istintaqa təhvil verilib. Hazırda iş üzrə zəruri istintaq və əməliyyat tədbirləri davam etdirilir.
