Mütəşəkkil Cinayətkarlıq və Korrupsiya Hesabatı Layihəsi (OCCRP) və Almaniyanın “Süddeutsche Zeitung” qəzetinin fərqli ölkələrdə fəaliyyət göstərən 48 media qurumu ilə birlikdə apardığı araşdırma nəticəsində İsveçrədəki 18 min bank hesabı araşdırılıb. OC Media yazır ki, araşdırmalar anonim mənbə tərəfindən “Süddeutsche Zeitung” qəzetinə məlumat ötürülməsindən sonra başlayıb.
Araşdırmalar zamanı azərbaycanlı və erməni siyasətçilərlə yanaşı, İordaniya kralı Abdullah, Venesuela neft şirkətlərinin rəhbərləri, Vatikan rəsmiləri, eləcə də çox sayda məşhur simanın İsveçrə banklarında hesabı olduğu aşkarlanıb.
Vasif Talıbov və oğulları
Araşdırma ortaya çıxarıb ki, Naxçıvan Ali Məclisinin sədri və 1995-ci ildən Naxçıvan Muxtar Respublikasına rəhbərlik edən Vasif Talıbovun oğulları Seymur və Rza Talıbovların “Credit Suisse” və eləcə də müxtəlif banklardakı hesablarında 2007-2012-ci illər arasında 20 milyon dollardan çox vəsaitləri olub. Sızdırılmış bank sənədlərində görünür ki, Talıbovun oğulları milyonlarla pul vəsaitini “Azərbaycan” və “Troyka” çirkli pulyuma mexanizmlərinə daxil olan saxta ofşor şirkətlər vasitəsilə əldə edib.
Məqalədə qeyd olunur ki, Naxçıvan MR-nı “dəmir yumruğu” ilə idarə edən Talıbov hakimiyyətə Azərbaycanın mərhum prezidenti Heydər Əliyev vasitəsilə gəlib. Talıbovun rəsmi maaşı illik 26 min dollardan azdır. Onun ən yaxın qohumlarının adı da “Azərbaycan” və “Troyka” “pulyuyan” maşınlarına qarışıb.
“Azərbaycan” və “Troyka” nədir: Bu mexanizmlər OCCRP tərəfindən aşkar edilmiş “çirkli pulların yuyulması” əməliyyatlarıdır. Araşdırmalar nəticəsində ilk növbədə Rusiya və Azərbaycandan külli miqdarda pul vəsaitinin çıxarıldığı və “yuyulduğu” məlum olub.
