Almaniya kansleri Olaf Şolts “Şimal axını 2” Rusiya-Almaniya qaz kəməri üçün sertifikatlaşdırma prosesini dayandırdıqlarını bəyan edib. Bu barədə mətbuat konfransında danışan Şolts bildirib ki, qərar Rusiya-Ukrayna münaqişəsinin kəskinləşməsi və Kremlin qondarma DXR və LXR-i tanıması fonunda qəbul edilib:
Rusiya qoşunlarının Ukraynaya müdaxiləsi beynəlxalq hüququn ciddi şəkildə pozulmasıdır. Almaniya İqtisadiyyat Nazirliyindən qaz kəmərinin hələlik sertifikatlaşdırılmaması üçün lazımi inzibati tədbirlər görməyi xahiş etmişəm. Bu sertifikat olmadan “Şimal axını 2” işə salına bilməz.
Olaf Şolts
Kansler onu da vurğulayıb ki, Qərb ölkələri Rusiyanın Donetsk və Luqansk Xalq Respublikalarının müstəqilliyini tanımasını qəbul edə bilməyəcək.
“Şimal axını 2” nədir: Baltik dənizi vasitəsilə Rusiyadan Almaniyaya 1234 km uzunluqda olan magistral qaz kəməri “Şimal axını”nın davamıdır. Almaniya, Danimarka, Rusiya, Finlandiya və İsveçin iqtisadi zonalarından və ərazi sularından keçir. Qaz kəmərinin tikintisi sentyabrın 10-da başa çatıb. O, Avropaya birbaşa qaz nəqli məqsədilə Baltik dənizinin dibi ilə Rusiyadan Almaniyaya qədər tikilib.
