Avropa İttifaqı Rusiyanın müdafiə naziri Sergey Şoyquya qarşı sanksiyalar tətbiq etməyi planlaşdırır. Bu haqda “The Wall Street Journal” özünün diplomat mənbəsinə istinadən məlumat yayıb. Bildirilir ki, nazirlə yanaşı ABŞ-da seçkilərə müdaxilədə ittiham edilən “İnternet Araşdırmaları Agentliyi”nə qarşı da sanksiyalar tətbiq oluna bilər.
“The Guardian” nəşri isə yazır ki, Sergey Şoyqu ilə yanaşı Putinin qərargah rəisi, qərarların qəbulunda fəal rol oynayan Anton Vayno, həmçinin Qara dəniz donanmasının baş komandanı İqor Osipov və Rusiya Aerokosmik Qüvvələrinin baş komandanı Sergey Surovikin də var.
Qeyd olunur ki, sanksiyalar həmçinin, Xarici İşlər Nazirliyinin sözçüsü Mariya Zaxarova, RT kanalının rəhbəri Marqarita Simonyan, “Russia One” kanalının aparıcısı Vladimir Solovyov və biznesmen Yevgeniy Priqojini hədəfləyib.
Rusiyanın beynəlxalq təzyiqlə üzləşmə səbəbi: Ukrayna ərazisində yerləşən tanınmamış Donetsk və Luqansk Xalq Respublikaları Rusiyadan müstəqilliklərinin tanınmasını istəyiblər. Rusiya lideri Vladimir Putin hər 2 qondarma respublikanın müstəqilliyini tanıyıb, həmin bölgələrdə rus ordusuna sülhməramlı vəzifə yerinə yetirməyi tapşırıb. Qərb və Avropa ölkələri Rusiyanın bu qərarını neqativ qiymətləndirib. Britaniya Rusiyanın 5 bankına və 3 oliqarxına dərhal sanksiyalar tətbiq edib.
