Böyük Britaniyanın baş naziri Ukraynanın işğalına cavab olaraq Rusiyaya qarşı yeni sanksiyaları elan edib. “Sky News” yazır ki, bu haqda İcmalar Palatasına müraciətində danışan Conson ölkəsinin Ukraynanı dəstəkləmək üçün əlindən gələni edəcəyini bildirib.
Böyük Britaniya Rusiyaya qarşı hansı tədbirləri görəcək:
- Bütün böyük Rusiya banklarının aktivləri dondurulacaq. Bura 154 milyard funt sterlinq aktivləri olan VTB bank da daxildir;
- Gələn həftədən bütün Rusiya şirkətlərinə Böyük Britaniya bazarlarında qazanc əldə etməyi qadağan edən qanun qəbul ediləcək;
- Rusiyanın ən böyük müdafiə şirkəti olan “Rostec”in daxil olduğu fiziki və hüquqi şəxslərə, onların törəmə şirkətlərinə qarşı sanksiyalar tətbiq olunacaq;
- Britaniyada “müəyyən təyyarələrin” eniş imkanları məhdudlaşdıracaq. Rusiyanın “Aeroflot” aviaşirkətinin Böyük Britaniyada fəaliyyətinə qadağa qoyulacaq;
- Rusiyaya ixrac lisenziyalarını (elektrik komponentləri və ya hərbi yük maşını hissələri üçün) dərhal dayandıracaq;
- Geniş çeşiddə yüksək texnologiyaların Rusiyaya ixracını qadağan edən qanun qəbul edİləcək;
- Rusiya vətəndaşlarının Böyük Britaniyadakı bank hesablarında saxlaya biləcəyi əmanətlərin məbləğ məhdudlaşdırılacaq;
- Rusiyanın SWIFT (Ümumdünya Banklararası Maliyyə Telekommunikasiya Cəmiyyəti) ödəniş sisteminə çıxışını bağlamaq üçün G7 və NATO müttəfiqləri ilə işlənəcək;
- Oxşar maliyyə sanksiyaları Ukraynaya hücumda roluna görə Belarusa da şamil ediləcək;
- Böyük Britaniyada pul toplayan ruslara qarşı tədbir görəcək iqtisadi cinayətlər haqqında qanun layihəsi hazırlanacaq.
Boris Conson Ukraynada baş verənlərə münasibət bildirərkən vurğulayıb ki, Vladimir Putin dünyanın və tarixin gözü qarşısında qınanacaq:
O, heç vaxt Ukraynanın qanını əlindən təmizləyə bilməyəcək. Böyük Britaniya və müttəfiqləri diplomatiya üçün hər yolu sınayıblar. Son saatda mən belə nəticəyə gəldim ki, nə etsək də, Putin həmişə qonşusuna hücum etməkdə qərarlı olub.
Boris Conson
Baş nazir onu da əlavə edib ki, Vladimir Putinin iyrənc və barbar təşəbbüsü uğursuzluqla başa çatmalıdır.
