Bu gün Rusiya ordusu prezident Vladimir Putinin əmri ilə Ukrayna ərazisində yerləşən Donbassda hərbi əməliyyatlara başlayıb. Ukraynanın paytaxtında və digər şəhərlərdə sakinlər qatar stansiyalarına toplaşaraq yollara çıxıblar. Hər iki tərəfin Silahlı Qüvvələri və Müdafiə Nazirliklərinin yaydığı məlumatlar bir-birini təkzib etsə də, itkilər açıqlanıb.
Bu saata qədər bildiklərimiz:
- Belarus ərazisindən Ukraynanın cənub-şərq istiqamətinə 4 ballistik raket atılıb;
- Rus qoşunları Belarus ərazisindən Çernobıl AES zonasına daxil olub;
- Odessanın Podolski rayonunda hərbi hissənin atəşə tutulması nəticəsində 22 nəfər həlak olub;
- “Javelin” zenit-raket komplekslərindən istifadə edilərək rus ordusunun 15 ədəd “T-72” tankı sıradan çıxarılıb;
- Rusiya Hərbi Hava Qüvvələrinə məxsus 7 təyyarə məhv edilib;
- Xarkov bölgəsində rus ordusunun 4 tankı yandırılıb. Mariupol və Şastie şəhəri üzərində tam nəzarət ələ alınıb;
- Rusiyanın 2 helikopteri və onlarla zirehli texnikası məhv edilib, Şastie ərazisində 50-yə yaxın rus əsgəri öldürülüb;
- Yampol motoatıcı alayının 91701 saylı hərbi hissəsindən 2 rus əsgəri əsir götürülüb;
- Obuxov vilayətində Ukrayna Silahlı Qüvvələrinə məxsus hərbi təyyarə qəzaya uğrayıb. Göyərtədə olan 14 nəfərdən 5-i ölüb;
- Odessa vilayətinin Podolski rayonunda hərbi hissəyə zərbə endirilməsi nəticəsində 18 nəfər həlak olub;
- Kiyev vilayətinin Mejıqorı səmasında Rusiyanın Ka-52 helikopteri vurulub.
Rusiya MN sözçüsü general-mayor İqor Konaşenkov Ukraynanın məhv edilən obyektlərini açıqlayıb:
- 74 yerüstü hərbi infrastruktur obyekti;
- 11 Hərbi Hava Qüvvələri aerodromu;
- 3 komanda məntəqəsi;
- Ukrayna Hərbi Dəniz Qüvvələri bazası;
- 18 zenit-raket kompleksi radar stansiyası;
- Ukraynanın döyüş helikopteri və 4 Bayraktar TB-2 pilotsuz uçuş aparatı vurulub;
- Donbassda xüsusi əməliyyat zamanı Su-25 hücum təyyarəsi qəzaya uğrayıb, pilot katapulyasiya olunaraq bazaya qayıdıb;
- Donbassda 15 ukraynalı hərbçi təslim olub.
