Avropa İttifaqı ölkələri anti-Rusiya sanksiyaları paketinə Rusiya prezidenti Vladimir Putin və xarici işlər naziri Sergey Lavrovun daxil edilməsinə razılaşıblar. “RİA Novost” yazır ki, bunu Avstriyanın xarici işlər naziri Aleksandr Şallenberq bildirib. Onun sözlərinə görə, sanksyalara Putin və Lavrova səyahət qadağası qoymaq daxil deyil:
Aİ Putin və Lavrovun bank hesablarını donduracaq. Lakin onlar üçün giriş qadağası olmayacaq, çünki biz Ukraynada zorakılığa son qoymaq üçün danışıqlar imkanını saxlamaq istəyirik.
Aleksandr Şallenberq
Sanksiya ilə bağlı Almaniyanın XİN rəhbəri Annalena Berbok bildirib ki, məqsəd Rusiya hökuməti beynəlxalq, siyasi cəhətdən təcrid etməkdir və bu, Putinə, eyni zamanda xarici işlər nazirinə qarşı sanksiyalar tətbiq etməklə edilir.
Rusiyaya niyə sanksiyalar tətbiq olunur: Fevralın 21-də Rusiya prezidenti Vladimir Putin qondarma Donetsk və Luqansk Xalq Respublikalarının suverenliyini tanıdığını elan edib. Fevralın 24-də isə rus ordusu Ukraynada hərbi əməliyyata başlayıb. Buna cavab olaraq Qərb ölkələri sanksiyalara başlayıblar. Rusiyanın əsas banlarından olan VTB daxil olmaqla bir neçə iri bankların xaricdəki aktivləri dondurulub. Rusiyaya yüksək texnologiyalı məhsulların tədarükünə qarşı sanksiyalar tətbiq edilib. Almaniya “Şimal axını 2” qaz kəmərinin sertifikatlaşdırılmasını dayandırıb. Böyük Britaniyada “Aeroflot”un fəaliyyəti dayandırılıb.
