Avstraliya Rusiya prezidenti Vladimir Putin, xarici işlər naziri Sergey Lavrov, eləcə də Rusiya Təhlükəsizlik Şurasının digər üzvlərinə qarşı maliyyə sanksiyaları və ölkəyə giriş qadağası qoyub. Bu barədə məlumat Avstraliyanın baş naziri Skott Morrisonun rəsmi saytında yerləşdirilib:
Biz Rusiya prezidenti Vladimir Putindən Ukraynaya qarşı apardığı əsassız müharibəyə görə cavab verməyi tələb edirik. Sanksiyalar gecə yarısından etibarən qüvvəyə minəcək. Prezident Putin, xarici işlər naziri Lavrov və müdafiə naziri Şoyqu Rusiyanın Ukraynaya hücuma görə birbaşa məsuliyyət daşıyırlar.
Skott Morrison
Sanksiyalar kimlərə tətbiq olunur:
- Rusiya prezidenti Vladimir Putin;
- xarici işlər naziri Sergey Lavrov;
- baş nazir Mixail Mişustin;
- daxili işlər naziri Vladimir Kolokoltsev;
- müdafiə naziri Sergey Şoyqu.
Morrison vurğulayıb ki, hər hansısa prezidentin bu cür sanksiyalarla üzləşməsi çox nadir halda baş verir və Vladimir Putin Zimbabvedən Robert Muqabe, Liviyadan Müəmmər Qəddafi və Suriyadan Bəşər Əsədin daxil olduğu çox kiçik qrupa daxil olub. Baş nazir onu da əlavə edib ki, Avstraliya indiyədək Putinin qanunsuz və zorakı ambisiyalarını həyata keçirən korrupsioner oliqarxlar, deputatlar və hərbi komandirlər daxil olmaqla 350-dən çox rusiyalıya sanksiya tətbiq edib:
Rusiyanın Belarusdan hücumlara keçməsinə icazə verərək Putinin təcavüzünə kömək edən Belarusun müdafiə naziri Viktor Xrenin də daxil olmaqla, 13 Belarus fiziki və hüquqi şəxsə sanksiya tətbiq etdik.
Skott Morrison
Baş nazir onu da bildirib ki, Avstraliya Avropa İttifaqı və ABŞ-ın elan etdiyi tədbirləri, o cümlədən Rusiya Mərkəzi Bankına qarşı məhdudiyyətləri və bir sıra maliyyə institutlarının SWİFT-dən ayrılmasını dəstəkləyir.
