“Şimal axını 2” qaz kəmərini inşa edən İsveçrə şirkəti ona qarşı tətbiq edilən məhdudiyyətlər səbəbindən müflis olmaq üçün müraciət etməyi nəzərdən keçirir. Bu haqda məlumatı “Reuters” agentliyi açıqlamadığı iki mənbəsinə istinadən yayıb.
Nəşrin mənbələrinə görə, şirkət bir sıra öhdəlikləri həll etmək üçün maliyyə məsləhətçisi ilə işləyir və bu həftənin əvvəlində İsveçrə məhkəməsində rəsmi olaraq müflisləşmə proseduruna başlaya bilər.
“Şimal axını 2” niyə müflisləşir: Rusiyanın qondarma Donetsk və Luqansk Xalq Respublikalarını tanımasından sonra fevralın 22-də Almaniya kansleri Olaf Şolz “Şimal axını 2” layihəsinin sertifikatlaşdırılmasını dayandırdıqlarını bəyan edib. Daha sonra ABŞ prezidenti Co Bayden öz administrasiyasına Rusiyanın Ukraynadakı hərəkətlərinə cavab olaraq “Şimal axını 2” layihəsinin operatoru “Nord Stream 2 AG” və onun rəhbərliyinə qarşı sanksiyalar tətbiq etməyi əmr edib.
“Şimal axını 2” nədir: Baltik dənizi vasitəsilə Rusiyadan Almaniyaya 1234 km uzunluqda olan magistral qaz kəməri “Şimal axını”nın davamıdır. Almaniya, Danimarka, Rusiya, Finlandiya və İsveçin iqtisadi zonalarından və ərazi sularından keçir. Qaz kəmərinin tikintisi sentyabrın 10-da başa çatıb. O, Avropaya birbaşa qaz nəqli məqsədilə Baltik dənizinin dibi ilə Rusiyadan Almaniyaya qədər tikilib.
