Ukrayna prezidenti Vladimir Zelenski Rusiyanın Ukraynaya hücumuna Gürcüstanın münasibətini “əxlaqsız mövqe” adlandırdıqdan, eləcə də Gürcüstan gürcü könüllü döyüşçülərin Ukraynaya aparılması üçün nəzərdə tutulan çarter reysini əngəllədikdən sonra Ukraynanın Gürcüstandakı səfiri İqor Dolqov geri çağırılıb.
OC media yazır ki, Zelenski xarici vətəndaşların döyüşmək üçün Ukraynaya getməsinə çağırış etdikdən sonra gürcü könüllülər döyüşə getmək istəyiblər. Lakin onlar bidiriblər ki, bazar ertəsi axşamı könüllüləri aparmaq üçün Ukrayna hökumətinin ayırdığı təyyarənin Tbilisiyə enməsinə maneə törədilib.
Ukraynanın baş naziri Denis Şmiqal təyyarənin enişinə icazə verməsi üçün Gürcüstan hökumətinə təzyiq göstərməyə çalışıb. Şmiqal tvitterdə ukrayna, ingilis, rus və gürcü dillərində mesajlar paylaşaraq, gürcü həmkarı İrakli Qaribaşvilinin cəsarət göstərəcəyinə və uçuşa icazə verəcəyinə ümid etdiyini bildirib:
Azadlığı sevən gürcü xalqı, baş nazirinizə düzgün qərar verməsi üçün kömək edin!
Denis Şmiqal
Ukrayna baş naziri Denis Şmiqalın müraciətindən sonra Gürcüstanın parlament binası qarşısında Ukrayna ilə həmrəylik nümayiş etdirmək, eləcə də gürcü hökumətinin işğalla bağlı açıqlamalarına qarşı etiraz aksiyası keçirilib.
Gürcülərin Ukraynaya getmə istəyi: Ukrayna prezidenti Vladimir Zelenski Ərazi Müdafiəsi üzrə Beynəlxalq Legionun yaradıldığını elan etdikdən sonra gürcü könüllülər Ukraynaya getmək üçün təşkilatlanmağa başlayıblar. Bəzi mənbələrin məlumatlarına əsasən, 60-a yaxın könüllüdən ibarət qrup avtobusla Tiflisdən yola düşüb. Bir qrup gürcü könüllü isə müharibəyə qoşulmaq üçün deyil, ukraynalılara maddi-texniki baxımdan kömək etmək üçün Ukraynaya getmək istədiklərini söyləyib.
Gürcüstanın “İşğala Qarşı Mübarizə Hərəkatı”nın lideri Davit Katsarava feysbukda paylaşdığı yazıda Gürcüstan hökumətini “Rusiyanın müttəfiqi” adlandıraraq özü də daxil olmaqla digər könüllülərin Ukraynaya aparılması üçün təşkil olunan reysin ləğv edilməsini qınayıb. Belə ki, könüllülər bu reyslə öncə Polşaya uçmağı, ordan isə Ukraynaya getməyi planlaşdırıb.
Gürcülərin Ukrayna getmək istəyinə hökumət nə deyir: İqtidarda olan “Gürcü Arzusu” partiyasının rəhbəri İrakli Kobaxidze bildirib ki, hökumətin gürcü könüllülərin Ukraynaya göndərilməsinə icazə verməsi onların müharibədə iştirak etməsinə icazə vermək deməkdir. Bundan başqa, Parlament iclası zamanı hakim partiya kifayət qədər iş görmədikləri ilə bağlı iddialara kəskin şəkildə etiraz edib. Hakim partiyanın təşəbbüsü ilə Gürcüstan parlamenti bazar ertəsi plenar iclasını Ukrayna himninin oxunması ilə açıb və kürsüdə Ukrayna bayrağı dalğalanıb.
Xarici vətəndaşların Ukraynada döyüşməsinə NATO münasibəti: Bir çox ölkə, o cümlədən NATO ölkələri öz vətəndaşlarının Rusiya işğalına qarşı döyüşmək üçün Ukraynaya getməsinə açıq şəkildə icazə verib. Böyük Britaniyanın xarici işlər naziri Liz Trass bu məsələdə ingilisləri tamamilə dəstəkləyəcəyini vurğulayıb.
