Avropa İttifaqı Rusiyanın daha əvvəl sanksiyalara məruz qoyduğu 7 bankını banklararası ödəniş sistemi SWIFT-dən (Society for Worldwide Interbank Financial Telecommunication) rəsmən ayırıb. Məlumat təşkilatın rəsmi saytında yerləşdirilib.
Siyahıda olan banklar:
- VTB
- “Rossiya”
- “Otkritie”
- Novikombank
- Promsvyazbank
- Sovcombank
- VEB
Bundan əlavə, istisnalar olmaqla, avro əskinaslarını Rusiyaya çatdırmaq, köçürmək və ya ixrac etmək qadağandır.
SWIFT nədir: 1973-cü ildə 19 ölkədən olan 248 bank tərəfindən Belçika qanunvericiliyinə əsasən yaradılmış bir cəmiyyətdir. Məlumat mübadiləsini aparan və ödənişləri həyata keçirən eyni adlı banklararası sistemə nəzarət edən beynəlxalq təşkilatdır. 2 mindən çox bank və maliyyə institutu SWIFT şəbəkəsinin ortaq sahibidir. SWIFTNet şəbəkəsi vasitəsilə pul köçürmələri, ödənişlər və qiymətli kağızların mübadiləsi haqqında məlumatların ötürülməsi üçün ən sürətli və təhlükəsiz kanaldır. “Visa” və ya “Mastercard” kimi ödəniş sistemlərindən fərqli olaraq, SWIFT yalnız banklararası səviyyədə istifadə olunur.
Rusiyanın SWIFT-lə hədələnməsi: 2014-cü ildə Krımın Rusiyaya birləşdirilməsindən və Ukraynadakı daxili siyasi vəziyyətin ağırlaşmasından sonra Qərb ölkələri təzyiq vasitəsi kimi Rusiyanı SWIFT-dən ayırmaqla hədələməyə başlamışdı. Bu cür çağırışlar çox olsa da, təşkilatın nümayəndələri Rusiyanı sistemdən ayırmaq niyyətində olmadıqlarını bəyan edirdilər. Rusiyanın SWIFT-dən ayrılma ehtimalı ilə bağlı müzakirələr 2021-ci ilin yazında, Avropa Parlamenti bunu tələb edən qərar qəbul etdikdən sonra yenidən başlamışdı.
SWIFT-dən çıxarılmanın Rusiyaya təsiri: Rusiya şirkətləri rahat və sürətli ödəniş üsullarından istifadə edə bilməyəcəklər. Bununla da qlobal miqyasda əməliyyat aparmaları məhdudlaşacaq. Rusiya dünyanın ən böyük kənd təsərrüfatı məhsulları və neft istehsalçı olduğuna görə yavaşlamalar ən çox bu sektorlara zərər vura bilər. SWIFT sistemindən uzaqlaşdırma nəticəsində ixrac məhsullarının ödənişlərində ciddi pozulamalar yaşana bilər. SWIFT-dən Rusiya banklarını uzaqlaşdırmaq sadəcə Rusiyaya deyil, onunla əməkdaşlıq edən digər ölkələrə də ziyan vuracaq. Xüsusilə bu ölkəyə ixrac və idxal edən şirkətlər ciddi zərər görəcəklər.
