Çexiya Ukraynadan gələn qaçqınların sayının artması ilə əlaqədar ölkədə martın 4-dən etibarən fövqəladə vəziyyət tətbiq olunacaq. Çexiyanın baş naziri Petr Fiala fövqəladə vəziyyət rejiminin 30 gün davam edəcəyini, lazım gələrsə, uzadıla biləcəyini deyib:
Biz bunu yalnız texniki səbəblərdən, qaçqın axınının öhdəsindən gəlmək üçün tətbiq edirik. Fövqəladə vəziyyət Çexiya vətəndaşlarının həyatına heç bir şəkildə təsir etməyəcək.
Petr Fiala
Baş nazir həmçinin bəyan edib ki, Çexiyanın bütün bölgələrində Ukrayna vətəndaşlarının qəbulu və qeydiyyatı mərkəzləri təşkil olunacaq. Bundan başqa, hakimiyyət ukraynalılara Çexiyanın əmək bazarına sərbəst giriş imkanı verən qanun layihəsi hazırlayır.
Çexiyanın daxili işlər naziri Vit Rakuşanın sözlərinə görə, Ukraynada hərbi əməliyyatlar başlayandan martın 4-nə qədər Çexiyaya gündə 5 minə qədər ukraynalı keçib və ümumilikdə 20 minə yaxın şəxs Çexiya ərazisinə daxil olub.
