Rusiya prezidenti Vladimir Putinin mətbuat katibi Dmitri Peskov “Reuters” agentliyinə müsahibəsində Ukrayna ərazisində hərbi əməliyyatların dayandırılması üçün şərtləri açıqlayıb. Peskovun sözlərinə görə, Ukrayna şərtlərdən xəbərdardır və əgər qəbul edərlərsə, müharibəni bir anda dayandırmaq olar.
Rusiyanın şərtləri nədir:
- Neytrallığı təmin etmək üçün Ukrayna konstitusiyasının dəyişdirilməsi;
- Krımı Rusiya ərazisi kimi tanımaq;
- Donetsk və Luqansk Xalq Respublikalarını müstəqil dövlət kimi tanımaq.
Kremlin sözçüsü vurğulayıb ki, Rusiyanın Ukraynaya qarşı heç bir ərazi iddiası yoxdur:
Biz həqiqətən Ukraynanın demilitarizasiyasını başa vururuq. Biz bunu bitirəcəyik. Amma əsas odur ki, Ukrayna hərbi fəaliyyətini dayandırsın. Onlar hərbi əməliyyatlarını dayandırsınlar, sonra heç kim atəş açmasın.
Dmitri Peskov
Qeyd edək ki, Rusiya 12-ci gündür davam etdirdiyi müharibəni dayandırmaq üçün Ukraynaya irəli sürdüyü şərtləri ilk dəfədir açıq şəkildə bəyan edir.
Ukraynada nə baş verir: Fevralın 24-də səhər 05:00 radələrində Rusiya Ukraynaya hücum edib və bunu “xüsusi hərbi əməliyyat” adlandırıb. Rusiya Ukraynaya şimaldan, şərqdən və cənubdan hücum edərək Kiyev, Xarkov və Mariupol limanı da daxil olmaqla, şəhərlərə zərbələr endirib. BMT-nin 7 marta olan məlumatında qeyd edilib ki, müharibə başlayan gündən bəri 406 dinc sakin həlak olub, 801 nəfər yaralanıb. Ölənlər arasında 40-dan artıq qadın və 30-ya yaxın uşaq var.
