11 martdan etibarən Rusiyanın qlobal internetlə əlaqəsi tamamilə kəsiləcək. Bu barədə ABŞ-ın “Market Rebellion” maliyyə şirkəti tvitterdə məlumat yayıb:
Yalnız Rusiya zonasındakı veb-saytlar və serverlər Rusiya ərazisində olanlar üçün əlçatan olacaq.
Market Rebellion
Şirkət qeyd edib ki, hələ 2019-cu ilin martında Rusiya qlobal internetdən ayrılmağı sınaqdan keçirib. Ölkə bir müddət dünyanın qalan hissəsi ilə əlaqəni kəsib, lakin öz vətəndaşları üçün daxili internet bağlantısını saxlayıb.
Bununla bağlı Rusiya nə deyir: Ölkənin Rəqəmsal İnkişaf Nazirliyinin mətbuat xidməti bildirib ki, ən azından Rusiya hakimiyyəti ölkəni qlobal internetdən ayırmağı planlaşdırmır. Lakin federal və regional icra hakimiyyəti orqanlarına kibergigiyena ilə bağlı tövsiyələr göndərilib.
Nələr tövsiyə olunur:
- martın 11-dək Rusiyada yerləşən DNS serverlərindən istifadəyə keçmək;
- xarici resurslardan yüklənmiş bütün JavaScript kodunu HTML səhifə şablonlarından silmək;
- xarici hostinqdən istifadə edildikdə, orada yerləşdirilən ictimai resursları Rusiya hostinqinə köçürmək;
- parol siyasətinin yenilənməsi və mürəkkəbləşdirilməsi;
- domen adlarında qeydiyyatçıların şəxsi hesablarında parolların dəyişdirilməsi.
Qeyd olunub ki, tövsiyələr resursları zərərli trafikdən daha səmərəli şəkildə qorumaq, saytların işlək vəziyyətdə qalmasını təmin etməyə və domen adlarına nəzarət etməyə kömək edəcək.
Rusiyada media və sosial medianın durumu: Ölkədə “facebook” və “twitter” bloklanıb, “youtube”da bir çox rusiyalının kanalı bağlanıb. “Booking.com” onlayn otel bron etmək sisteminin fəaliyyəti dayandırılıb. “Rusiyanın Ukrayanada hərbi əməliyyatları” ifadəsi əvəzinə “müharibə” sözünü işlətdiyinə görə martın 1-də “Dojd” telekanalının və “Exo Moskvı” radiostansiyasının saytları bloklanıb.
Rabitə, İnformasiya Texnologiyaları və Kütləvi Rabitələrə Nəzarət Federal Xidməti “Exo Moskvı”, “İnoSMI”, “Mediazona”, “New Times”, “Dojdd”, “Svobodnaya Pressa”, “Krym.Realii”, “Novaya qazeta”, “Jurnalist” və “Lenizdata” qəzetlərini hədələyərək Ukraynadakı müharibə ilə bağlı yazıları silməyi tələb edib.
