Yeni Zelandiya hökuməti Rusiya prezidenti Vladimir Putinə və nazirlərə qarşı sanksiya tətbiq etdiyini bəyan edib. Bu haqda Yeni Zelandiyanın Xarici İşlər Nazirliyi bəyanat yayıb. Ölkənin baş naziri Jacinda Ardern və xarici işlər naziri Nanaia Mahuta bildirib ki, söhbət Rusiyanın Ukraynaya müdaxiləsi ilə əlaqəli şəxslərin ölkəyə girişinə qadağadan gedir.
Sanksiya kimlərə aiddir:
- Vladimir Putin – Rusiya prezidenti;
- Mixail Mişustin – baş nazir;
- Sergey Lavrov – xarici işlər naziri;
- Sergey Şoyqu – müdafiə naziri;
- Aleksandr Bortnikov – Federal Təhlükəsizlik Xidməti rəhbəri;
- German Qref – “Sberbank”ın rəhbəri;
- Marqarita Simonyan – RT kanalının baş redaktoru;
- Mariya Zaxarova – Rusiya XİN sözçüsü.
Ümumilikdə, dərc olunan siyahıda rusiyalı siyasətçilər, iş adamları və onların qohumları daxil olmaqla, 100-ə yaxın şəxs var.
Putinə sanksiya tətbiq edən digər ölkələr: Daha əvvəl Putin və onun ətrafına qarşı şəxsi sanksiyalar ABŞ, Avropa İttifaqı, Böyük Britaniya, Kanada, Yaponiya və Avstraliya tərəfindən tətbiq edilib. Hətta Avstraliyanın baş naziri qeyd etmişdi ki, hər hansısa prezidentin bu cür sanksiyalarla üzləşməsi çox nadir halda baş verir, Vladimir Putin Zimbabvedən Robert Muqabe, Liviyadan Müəmmər Qəddafi və Bəşər Əsədin daxil olduğu çox kiçik qrupa daxil olub.
