ABŞ və Britaniya hökuməti Rusiyadan neft və neft məhsulları, eyni zamanda qazın idxalını qadağan etmək qərarına gəlib. Bununla bağlı ABŞ prezidenti Co Bayden fərman imzalayıb. Bayden etiraf edib ki, ABŞ-ın Avropadakı bütün müttəfiqləri və tərəfdaşları eyni addımı ata bilməz, lakin Avropanın Rusiyadan enerji asılılığını azaltmaq üçün uzunmüddətli strategiya hazırlanır.
ABŞ-ın ardınca Böyük Britaniyanın baş naziri Boris Conson 2022-ci ilə qədər Rusiyadan neft idxalını dayandıracaqlarını açıqlayıb. Onun bəyanatı Britaniya hökumətinin saytında dərc edilib. Krallığın biznes, energetika və sənaye strategiyası üzrə naziri Kvazi Kvartenq bildirib ki, bu imtina başqa şirkətlərə və təchizatçılara Rusiya idxalını əvəz etmək üçün kifayət qədər vaxt verəcək.
Britaniyada Rusiya neftinin rolu: Rusiyadan gələn neft Böyük Britaniyanın tələbatının 8%-ni, qazı isə 4%-dən azını təşkil edir. Avropa gündə təxminən 4 milyon barel Rusiya nefti və neft məhsulları idxal edir. Avropa Komissiyasının məlumatına görə, Rusiya 2019-cu ildə idxalın 27%-ni təşkil etməklə, hazırda Aİ-yə ən böyük xam neft ixracatçısıdır.
Aİ-nin mövqeyi: Avropa Birliyi martın 10-da Fransada keçiriləcək Aİ-27 liderlərinin sammitində Rusiyadan neft və qaz embarqosu məsələsinə baxacaq. Hələlik, bu qadağaya Almaniya qarşı çıxıb. Buna baxmayaraq, Aİ ilin sonuna qədər Rusiyadan asılılığının üçdə ikisini azaltmaq niyyətində olduğunu bildirir.
