Martın 8-i günorta saatlarından başlayaraq martın 9-u səhər saatlarınadək erməni silahlı qüvvələri Azərbaycan ordusunun Xocalı və Goranboy rayonlarında yerləşən mövqelərini müxtəlif çaplı atıcı silahlardan fasilələrlə atəşə tutub. Bu haqda Azərbaycanın Müdafiə Nazirliyi məlumat yayıb:
Təxribatların qarşısını almaq məqsədilə bu istiqamətlərdə yerləşən bölmələrimiz tərəfindən adekvat cavab tədbirləri görülüb. Azərbaycan ordusu heç bir halda mülki infrastrukturu hədəfə almır, yalnız qanunsuz erməni silahlı dəstələrinin mövqelərinə dəqiq zərbələr endirir.
Müdafiə Nazirliyi
Bildiririk ki, hazırda qeyd olunan istiqamətlərdə vəziyyət sabitdir, əməliyyat şəraiti Azərbaycan ordusunun tam nəzarəti altındadır.
Ermənistan nə deyir: Ermənistanın Müdafiə Nazirliyinin yaydığı məlumatda deyilir ki, martın 8-də saat 23.00-da Azərbaycan ordusu Əsgəran rayonunun Xramort kəndini atəşə tutub. Ermənistan tərəfdən itkinin olmadığı, vəziyyətin stabill olduğu bildirilib.
