Avropa İnsan Haqları Məhkəməsi Türkiyə vətəndaşlarının Azərbaycanla bağlı göndərdikləri şikayət barəsində qərarı elan edib. Bildirilir ki, Taci Şəntürk, İsa Özdəmir, Ayhan Səfəroğlu və Ərdoğan Taylan Azərbaycandan deportasiya edilmələri ilə Avropa Məhkəməsinə müraciət ediblər.
Şikayətlərin motivi: Adıçəkilən şəxslər Azərbaycandakı türk litseylərinin müəllimləri və iş adamları olublar. Türkiyədəki 15 iyul 2016-cı il olaylarından sonra Türkiyənin istəyi ilə saxlanılaraq məcburi ölkələrinə təhvil veriliblər. Ancaq onlar bundan öncə sığınacaq almaq üçün Azərbaycana müraciət ediblər, Türkiyəyə verildikdən sonra isə terror təşkilatına üzv olmaqda təqsirləndirilərək məhkum olunublar.
Qaldırılan iddialar: Şikayətçilərin iddiasında qeyd edilib ki, Türkiyəyə verilmələri onların Avropa Konvensiyası ilə təminat altına alınan işgəncəyə məruz qalmamaq, azadlıq və toxunulmazlıq, effektiv müdafiə vasitələri və əcnəbilərin çıxarılmasına dair prosedur təminatlar hüquqlarına müdaxilə hesab olunur.
Məhkəmənin qərarı: Ərizəçilərin hər birinə münasibətdə işgəncəyə məruz qalmamaq, azadlıq və toxunulmazlıq hüquqlarının pozulması qənaətinə gəlinib. Qərara əsasən, Azərbaycan hökuməti Taci Şəntürk, İsa Özdəmir, Ayhan Səfəroğlu və Ərdoğan Taylana ayrılıqda 9 min avro təzminat ödəməlidir.
