Rusiyanın Rabitə, informasiya texnologiyaları və kütləvi kommunikasiyalar sahəsində nəzarət üzrə Federal Xidməti (Roskomnadzor) ölkə ərazisində “İnstagram”ın istifadəsini dayandırıb. Bu barədə qurumun rəsmi saytında açıqlama yayılıb:
Rusiyanın Baş Prokurorluğunun tələbinə əsasən, ölkə ərazisində “İnstagram” sosial şəbəkəsinə giriş məhdudlaşdırılacaq.
deyə qeyd olunub
Bildirilib ki, bu qərar ruslara, o cümlədən rus hərbi qulluqçulara qarşı zorakılıq hərəkətləri etmək çağırışlarının yayılması ilə əlaqədar qəbul edilib.
Rusiya niyə belə qərar verib: Ötən gün Meta-nın (Facebook, İnstagram) sözçüsü Endi Ston CNN-ə müsahibəsində bildirib ki, bəzi ölkələrdə “İnstagram” və “Facebook” istifadəçilərinə müvəqqəti olaraq rus əsgərlərinə qarşı zorakılıq çağırışları etməyə icazə veriləcək. Şirkətin etik normalarla bağlı dəyişiklikləri Ermənistan, Azərbaycan, Macarıstan, Gürcüstan, Latviya, Litva, Polşa, Rusiya, Rumıniya, Slovakiya, Ukrayna və Estoniyaya şamil edilir.
Rusiyada sosial medianın durumu: Ölkədə “facebook” və “twitter” bloklanıb, “youtube”da bir çox rusiyalının kanalı bağlanıb.
