Rus ordusunun intensiv atəşə tutduğu İrpen şəhərində amerikalı jurnalist, 50 yaşlı kinorejissor Brent Renaud reportaj hazırlayarkən həlak olub. Bu haqda jurnalistin çalışdığı “Time Studios” məlumat yayıb:
Mükafat qazanan rejissor və jurnalist kimi Brent qardaşı Kreyq Renaudla birlikdə dünyanın ən çətin hadisələrini işıqlandırırdı. Son həftələrdə Ukraynada olan Brent qlobal qaçqın böhranı ilə bağlı “TIME Studios”un layihəsi üzərində işləyirdi. Jurnalistlərin Ukraynada davam edən işğalı və humanitar böhranı təhlükəsiz şəkildə işıqlandırması vacibdir.
Time Studio
İlkin məlumatlarda Ukrayna Daxili İşlər Nazirliyi öldürülən Renaudun “The New York Times” əməkdaşı olduğunu açıqlayıb. Lakin nəşr məsələyə aydınlıq gətirərək bildirib ki, jurnalist onlarla 2015-ci ildə çalışıb, öldürülərkən üzərində tapılan NYT jurnalist vəsiqəsi də həmin dövrə aiddir.
