Azərbaycan Xarici İşlər Nazirliyi Ermənistanla münasibətlərin normallaşdırılması üçün qarşı tərəfə təqdim olunan təklifləri açıqlayıb. XİN-nin mətbuat xidməti idarəsinin rəisi Leyla Abdullayeva bildirib ki, iki dövlət arasında münasibətlərin normallaşması üçün 5 baza prinsipləri müəyyən olunub.
Qeyd olunan 5 əsas prinsip:
- Bir-birinin suverenliyi, ərazi bütövlüyü, beynəlxalq sərhədlərinin toxunulmazlığı və müstəqilliyini tanımaq;
- Dövlətlərin bir-birlərinə qarşı ərazi iddialarının olmamasının qarşılıqlı təsdiqi və gələcəkdə belə bir iddianın qaldırılmayacağına dair hüquqi öhdəliyin götürülməsi;
- Dövlətlərarası münasibətlərdə bir-birlərinin təhlükəsizliyinə hədə törətməkdən, habelə BMT Nizamnaməsinin məqsədlərinə uyğun olmayan digər hallardan çəkinmək;
- Dövlət sərhədinin delimitasiyası və demarkasiyası, diplomatik münasibətlərin qurulması;
- Nəqliyyat və kommunikasiyaların açılışı, digər müvafiq kommunikasiyaların qurulması və digər sahələrdə əməkdaşlığın qurulması.
XİN rəsmisi qeyd edib ki, Azərbaycanın baza prinsiplərinə dair təklifi bir neçə gün öncə vasitəçilər tərəfindən Ermənistana təqdim olunub.
Ermənistan tərəf nə cavab verib: Bununla bağlı Ermənistanın Xarici İşlər Nazirliyi bəyanat yayıb. Bildirilib ki, “BMT Nizamnaməsi, Siyasi və Mülki Hüquqlar haqqında Beynəlxalq Pakt, Helsinki Yekun Aktı” əsasında sülh müqaviləsinin bağlanması ilə bağlı danışıqların təşkil edilməsi üçün ATƏT-in Minsk qrupunun həmsədrlərinə müraciət edilib.
