Ermənistan Türkiyə ilə diplomatik əlaqələr qurmağa və sərhədləri açmağa hazır olduğunu bəyan edib. Bu haqda Ermənistanın xarici işlər naziri Ararat Mirzoyan “Anadolu” agentliyinə müsahibəsində danışıb:
Ermənistan Türkiyə ilə diplomatik əlaqələr qurmağa, sərhədləri açmağa hazırdır. Türkiyəli həmkarımdan prosesin bu məqsədə doğru aparılması üçün siyasi iradənin olduğunu eşitməkdən məmnunam. Hesab edirəm ki, biz sürətlə konkret addımlar atmaqdan çəkinməməliyik.
Ararat Mirzoyan
XİN rəhbəri onu da əlavə edib ki, erməni xalqı normallaşmanın tərəfdarıdır:
Ümumiyyətlə, Ermənistan xalqı Türkiyə ilə münasibətlərin normallaşmasını istəyir. Bu, ictimai rəy sorğularında da özünü göstərir.
deyə qeyd edib
Nazir vurğulayıb ki, həm Ermənistanda, həm də Türkiyədə normallaşma prosesinə şübhə ilə yanaşan qruplar olsa da, problemləri həll etmək üçün hər iki tərəfin rəsmiləri siyasi liderlik etməlidir.
Ermənistan-Türkiyə arasında diplomatik münasibət:
- Bu ilin martına qədər Ermənistanla Türkiyə arasında diplomatik əlaqələr olmayıb.
- 2009-cu ildə Sürixdə iki dövlətin xarici işlər nazirləri diplomatik münasibətlərin qurulması, münasibətlərin prinsipləri haqqında protokollar imzalayıb. Lakin bu sənədlər hər iki dövlət tərəfindən ratifikasiya olunmayıb.
- 2018-ci il martın 1-də Ermənistan protokolları ləğv etdiyini açıqlayıb.
- 2021-ci ilin sonu hər 2 ölkə münasibətlərin normallaşdırılması üçün nümayəndələr təyin edib. Ankaranı Türkiyənin ABŞ-dakı keçmiş səfiri Serdar Kılıc, Ermənistanı isə parlamentin sədr müavini Ruben Rubinyan təmsil edib.
- Fevral ayından etibarən İstanbul-Yerevan-İstanbul marşrutu üzrə uçuşlara başlanıb.
- Ermənistanın xarici işlər naziri Ararat Mirzoyan 11-13 martda Antalyada keçirilən diplomatik foruma qatılıb.
