Ermənistan ordusunun döyüş mövqelərində son 24 saat ərzində iki əsgərin meyiti aşkarlanıb. “Sputnik Armenia”nın məlumatına görə, bu haqda Ermənistan Müdafiə nazirliyi açıqlama yayıb. Bildirilib ki, martın 17-də saat 10:30-da dislokasiya olunan hərbi hissələrdən birinin ərazisində güllə yarası almış 19 yaşlı Eduard Rüstəmyanın meyiti tapılıb.
Martın 16-sı axşam saatlarında isə 2002-ci il təvəllüdlü əsgər Albert Siroyanın çənəsindən güllələnmiş cəsədi aşkarlanıb. Hazırda hər iki hadisənin detalları araşdırılır.
“Sputnik Armenia” yazır ki, Ermənistan Müdafiə Nazirliyi atışma barədə xəbərləri təkzib edib:
Sosial şəbəkələrdə və KİV-də martın 16-da Azərbaycan Silahlı Qüvvələri bölmələrinin Ermənistanla sərhəddə təxribat törətməsi, nəticədə Ermənistan tərəfdən bir əsgərin şəhid olması, digərinin yaralanması ilə bağlı yayılan məlumatlar həqiqətə uyğun deyil.
deyə qeyd olunub
Nazirlik vətəndaşları sərhəddəki vəziyyətlə bağlı məlumat yayarkən yalnız rəsmi məlumatlara əsaslanmağa çağırıb.
