Biləsuvar Rayon İcra Hakimiyyətinin həbsdə olan keçmiş başçısı Mahir Quliyevin cinayət işi üzrə məhkəmə iclası başa çatıb. APA-nın məlumatına görə, Lənkəran Ağır Cinayətlər Məhkəməsinin hakimi Müşfiq Məmmədovun sədrliyi ilə keçirilən prosesdə sabiq icra başçısına hökm oxunub. O, 11 il müddətinə azadlıqdan məhrum edilib.
Bundan başqa, sabiq icra başçısına və ailə üzvlərinə məxsus 1 milyon 34 min manatlıq əmlaklar müsadirə olunub.
Müsadirə olunan əmlaklar:
1. Bakı şəhərində yerləşən 2 mənzil;
2. “Audi” markalı avtomobil.
Məhkəmə “Dost” İş Mərkəzi tərəfindən qaldırılmış 125 min manatlıq və Biləsuvar rayon İcra Hakimiyyəti tərəfindən qaldırılan 3 milyon manatlıq mülki iddialar da təmin edib.
Mahir Quliyev niyə həbs olunub: Sabiq icra başçısı 2020-ci il aprelin 29-da DTX-nin keçirdiyi əməliyyatla saxlanılıb. O, Cinayət Məcəlləsinin 179-cu (mənimsəmə və isriaf etmə), 308.1-ci (vəzifə səlahiyyətlərindən sui-istifadə etmə), 311.3.2-ci (təkrar rüşvət alma) və 313-cü (vəzifə saxtakarlığı) maddələrilə təqsirləndirilib.
