Rusiyanın Ukraynaya hərbi müdaxiləsindən sonra Rusiyada təzyiqlərlərin artması və ölkəyə tətbiq olunan sanksiyalar səbəbindən xeyli rus vətəndaş Cənubi Qafqaza köçüb. OC Media yazır ki, bu hal Gürcüstanda xeyli vətəndaşın narahatlığına səbəb olub.
Gürcülərin narahatlığı, hökumətdən tələbi
Gürcüstan İqtisadiyyat Nazirliyinin martın 7-sinə olan məlumatında qeyd olunub ki, müharibə başlayandan təxminən 20-25 min Rusiya vətəndaşı Gürcüstana üz tutub. Bu kütləvi miqrasiya Gürcüstanda qorxuları artırıb. İddia edilib ki, ola bilsin Rusiya keçmişdə Gürcüstana hücum edərkən orada çoxlu sayda Rusiya vətəndaşının olmasını bəhanə edib. Bir çox gürcü vətəndaşı hökumətdən ruslara qarşı yürüdülən yumşaq miqrasiya siyasətini sərtləşdirməyi tələb edir.
İctimai rəy nə göstərir: Qafqaz Tədqiqat Resurs Mərkəzlərinin (CRRC Georgia) Ukrayna ilə bağlı sorğusundan əldə edilən nəticələr göstərib ki, əhalinin əksəriyyəti miqrasiya məhdudiyyətlərinin tətbiq edilməsini dəstəkləyir:
- məhdudiyyət tərəfdarları – 59%
- qarşı çıxanlar – 31%
- bitərəf qalanlar – 9%
Toplanan statistika sosial və demoqrafik dəyişimlərə görə bölündükdə məlum olur ki, miqrasiya məhdudiyyətlərini dəstəkləyən qruplar arasında kəskin fərq var. Bir çox amillər nəzərə alındıqda məhdudiyyətləri daha çox gənclərin dəstəklədiyi bəlli olur:
- 18-34 yaşlılar – 60%
- 35-54 yaşlılar – 54%
- 55+ yaşlılar – 44%
Gürcüstanda yaşayan etnik azlıqlar da miqrasiya məhdudiyyətlərinin tətbiqini az dəstəkləyiblər. Onların yalnız 44%-i məhdudiyyət tərəfdarı olublar. İctimai rəy sorğusunda müxtəlif partiyaların tərəfdarları da fərqli fikirlər səsləndiriblər. Məhdudiyyətlərin tətbiqinə daha çox müxalif partiya dəstəkçiləri razı olublar:
- müxalifət partiya tərəfdarları – 65%
- hakim partiya tərəfdarları – 43%
- dəstəklədiyi partiya adını deməyənlər – 45%
- partiya seçimində əmin olmayanlar – 58%
QEYD: Yazıda göstərilən sosial və demoqrafik bölgülər reqressiya modelinə əsaslanır. Reqressiya modelinə yaş, cins, məcburi köçkün statusu, ümumi rifahın səviyyəsi, etnik mənsubiyyət (etnik azlıq və ya azlıq olmayan), təhsil səviyyəsi və s. məlumatlar daxildir.
