Mart 21-dən etibarən Xankəndi ərazisində yenidən qaz təminatında problem yarandığı deyilir. Bununla bağlı tanınmayan Dağlıq Qarabağ Respublikasının XİN-i Azərbaycan tərəfini ittiham edib:
Azərbaycan hakimiyyəti axşam saatlarında Qarabağa qaz verilişini yenidən kəsərək, çox soyuq hava şəraitində əhalini mühüm istilik resursundan məhrum edib. Beynəlxalq ictimai və humanitar hüququn bütün norma və prinsipləri kobud şəkildə pozulur.
Tanınmayan DQR XİN
Azərbaycan Xarici İşlər Nazirliyi məsələyə münasibət bildirərək iddiaları əsassız adlandırıb:
Ermənistan XİN-i bir neçə gün öncə beynəlxalq təşkilatların Azərbaycan ərazisində keçirilən tədbirdə iştirakı ilə bağlı, indi isə digər bir mövzu ilə bağlı Azərbaycanın daxili işlərinə qarışmağa cəhd göstərir. Ermənistanın əsassız iddialarla çıxış edərək davamlı şəkildə qeyri-konstruktiv yanaşma sərgiləməsi bu ölkənin əsl niyyətini üzə çıxarır.
Azərbaycan XİN
Dağlıq Qarabağda qaz probleminin başlaması: Azərbaycan ordusunun nəzarətində olan ərazidə qaz kəmərinin zədələnməsi nəticəsində martın 8-də Dağlıq Qarabağın əksər hissəsində, o cümlədən Xankəndi istiliksiz qalıb. Azərbaycan tərəfi martın 16-sı qaz kəmərini təmir edib.
