“WikiLeaks”in qurucusu Culian Assanc Londondakı Belmarş həbsxanasında nişanlısı və iki uşaq anası Stella Morislə evlənib. “Bloomberg”in məlumatına görə, nikah mərasimində cütlüyün iki oğlu da daxil olmaqla altı qonaq iştirak edib. Bildirilir ki, mərasimə iki mühafizəçi nəzarət edib. Təhlükəsizliyə görə həbsxana rəhbərliyi Assancın toyda çəkilmiş fotoşəkillərinin yayılmasını qadağan edib.
Assanc kimdir: Culian Assanc 2006-cı ildə bir sıra hökumətlər, ABŞ rəhbərliyinin fəaliyyəti barədə məxfi informasiyaları, həmçinin Əfqanıstan və İraqda keçirilən hərbi əməliyyatların gedişində dinc əhalinin öldürülməsi, Quantanamo həbsxanasında məhkumların saxlanılma şəraiti barədə “WikiLeaks”da yaymışdı.
2012-ci ildə Ekvadorun Londondakı səfirliyinə sığınan Assanc 7 il orada gizlənsə də, 2019-cu il aprelin 11-də həbs edilib. Bundan sonra ABŞ hakimiyyəti Culian Assanca qarşı casusluq və məxfi informasiyanın yayılması ilə bağlı ittihamlar irəli sürüb. O, Londondan ABŞ-a ekstradisiya olunarsa, 175 il həbs cəzası alacaq.
