Polşa 45 rus diplomatını casusluqda şübhəli bilərək ölkədən çıxardığını açıqlayıb. Bununla bağlı ölkənin Daxili Təhlükəsizlik Agentliyi bəyanat yayıb:
Müəyyən edilmiş kəşfiyyatçıların və onlarla əməkdaşlıq edən şəxslərin fəaliyyəti Polşa Respublikasının, eyni zamanda onun tərəfdaşlarının beynəlxalq arenada sabitliyinə, Polşanın maraqlarına və təhlükəsizliyinə təhlükə yaradır.
deyə bildirilib
Daxili Təhlükəsizlik Agentliyi 45 nəfərin adı olan siyahını Xarici İşlər Nazirliyinə təqdim edib və həmin şəxslərin təcili Polşa ərazisindən çıxarılmasını xahiş edib. Vurğulanıb ki, Rusiya xüsusi xidmətinin əməkdaşları kəşfiyyat aparmaq üçün diplomat statusundan istifadə edərək Polşa qanunlarını və Vyana Konvensiyasının müddəalarını pozublar.
Polşanın iddiası nədir: Agentliyin məlumatına görə, ölkədən çıxarılan diplomatlardan biri Rusiya xüsusi xidmət orqanlarının əməkdaşıdır. Onun fəaliyyəti casusluqda şübhəli bilinərək martın 17-sində saxlanılan Polşa vətəndaşının istintaqı zaman üzə çıxıb. Rus kəşfiyyatı ilə əməkdaşlıqda ittiham edilən polyak Varşava qeydiyyat idarəsinin arxivində işləyib, həmçinin paytaxtın daha iki ümumi arxivinə girişi olub.
Rusiyanın münasibəti: Rusiya Xarici İşlər Nazirliyinin sözçüsü Mariya Zaxarova bildirib ki, Moskva diplomatlarının Polşadan çıxarılmasına “uyğun cavab” verəcək. Rusiya prezidentinin mətbuat katibi Dmitri Peskov isə Polşanın addımının cavabsız qalmayacağını deyib.
